पोखरा, प्रदेश खेलकुद परिषद गण्डकीले सुचिकृत भएका रेफ्रि र प्रशिक्षकहरुको जिवन विमा गर्ने तयारी सुरु गरेको छ ।

सुचिकरणको लागि ३५ दिने सूचना प्रकाशित गरेको परिषदले सूचिकृत भएका सबैको जिवन विमा समेत गर्ने तयारी सुरु गरेको हो । सो बारे जानकारी दिंदै परिषदका सदस्य सचिव श्रीधर शर्माले आर्थिक वर्ष २०८०/०८१ को विनियोजित बजेटबाट सबैको जिवन विमा गरिने जानकारी दिए ।

परिषदले गत साउन १ गते एक ३५ दिने सूचना प्रकाशित गरि रेफ्रि, निर्णायक, जज, प्रशिक्षक तथा खेलस्थलहरुको समेत सूचीदर्ताका लागि आह्वान गरे संगै जिल्ला खेलकुद विकास समितिहरुमा सूचिकृत अभियान जारी रहेकै बेला परिषदले सबैको जिवन विमाको तयारी सुरु गरेको जानकारी दिंदै सदस्य सभिव शर्माले भने–“हामीले उहाँहरुलाई सूचिकृत गर्न आह्वान गरेका छौं । तद्अनुरुप जिल्ला–जिल्लामा उहाँहरुले सूचिकरण गर्दै हुनुहुन्छ भने परिषदले जिवन विमाको तयारी समेत सुरु गरेको छ ।”

परिषदले सबैको अपनत्व प्रदान गरि प्रदेशको खेलकुद विकास अभियानमा संगै अघि बढाउन जिवन विमा कार्यक्रमले सहयोग पुग्ने सदस्य सचिव शर्माले बताए । “उहाँहरु सूचिकृत हुने मात्रै कुरा होइन । सूचिकृत भए संगै उहाँहरुलाई परिषदले उपलव्ध गराउने सेवा पनि अर्को महत्वपूर्ण पाटो हो”, शर्माले भने–“३५ दिन भित्र सूचिकृत भए संगै हामीले उहाँहरुलाई प्रशिक्षण गर्ने कार्यक्रम पनि समावेश गर्दैछौं ।”