पोखरा । गण्डकी प्रदेशका मुख्यमन्त्री खगराज अधिकारीले विश्वासको मत पाएनन् ।
शनिबार प्रदेश सभामा विश्वासको मत पाउँ भन्ने प्रस्ताव राखेका थिए । उनको प्रस्तावलाई प्रदेश सभाले अस्वीकृत गरेको छ ।
गण्डकी प्रदेशका सभामुख कृष्णप्रसाद धितालले मुख्यमन्त्री अधिकारीले राखेको विश्वासको मतको प्रस्ताव अस्वीकृत भएको घोषणा गरे ।
विश्वासको मत प्राप्त होस भन्ने पक्षमा २४ मत र विपक्षमा ३५ मत प्राप्त गर्दै अधिकारीले राखेको विश्वासको मत बहुमतले अस्वीकृत भएको घोषणा गरे ।
सरकार कायम राख्नका लागि ३१ सिट आवश्यक पर्दछ ।
मुख्यमन्त्री अधिकारीले विश्वासको मतका लागि संसदमा प्रस्ताव पेस गरेका थिए । माओवादीले चैत १० गते सरकारबाट बाहिरिँदै सरकारलाई दिएको समर्थन फिर्ता लिएको थियो ।
सोही दिनदेखि अल्पमतमा परेका अधिकारीले संविधानको धारा १८८ (२) बमोजिम संसदमा प्रस्ताव प्रस्तुत गरेका थिए । उक्त व्यवस्था अनुसार सरकारलाई समर्थन गरेको दलले समर्थन फिर्ता लिए ३० दिनभित्र विश्वासको मतको लागि प्रस्ताव गर्नुपर्ने उल्लेख छ ।
अधिकारी माओवादी र राप्रपाको समर्थनमा पुस २५ गते मुख्यमन्त्री बनेका थिए । उनले संसदलाई सम्बोधन गर्दै केन्द्रको निर्देशनमा रातारात समर्थन फिर्ता लिँदा प्रदेशप्रति गम्भीर हुन नसकेको आरोप लगाए । गण्डकी प्रदेशमा नेपाली काग्रेसका २७, नेकपा एमालेका २२, माओवादीका ८, राप्रपाका २ र एक स्वतन्त्र सांसद रहेका छन् ।
