पोखरा । नेपाली काँग्रेस पोखरा नगरसमितिले प्रतिनिधि सभा सदस्य तथा गण्डकी प्रदेश सभा सदस्यमा निर्वाचित सभासदहरुका लागि आयोजना गर्न लागेको विशेष सम्मान कार्यक्रमको तयारी तिब्र पारेको छ ।
आँउदो फागुन २२ गते काँहुँडाडामा आयोजना गर्न लागेको विशेष सम्मान कार्यक्रमको तयारी तिब्र पारिएको सभापति सुरेन्द्रमान विजुक्छेको जानकारी दिए ।
नेपाली कॅाग्रेसका उपसभापति एवम् सभासद धनराज गुरुङको प्रमुख आतिथ्यतामा कार्यक्रम आयोजना गरिने सभापति विजुक्छेले बताए ।
कार्यक्रममा गएको मंसिर ४ गते सम्पन्न प्रतिनिधि सभा र प्रदेश सभाको निर्वाचनमा नेपाली काँग्रेस पार्टी तर्फबाट विजयी सभासदहरुलाई सम्मान गरिने नगर उपसभापति एवम् कार्यक्रम संयोजक प्रयागराज भण्डारीले बताए ।
कार्यक्रम सम्पन्न गर्न भवसागर बराल सह संयोजक रहेको तयारी उपसमिति गठन गरिएको छ भने सदस्यहरुमा टुवराज बाँस्तोला, गणेशबहादुर थापा, धनञ्जय पौडेल, संघर्ष कोइराला, अम्बिका ढुंगाना, प्रिति पाण्डे र रीता गुरुङ रहेकाछन् ।
यसैगरी सचिव टुवराज बाँस्तोला उपसंयोजक रहेको अर्थ संकलन उपसमिति, कार्य सम्पादन समिति सदस्य रीता गुरुङ उपसंयोजक रहेको प्रचारप्रसार र निमन्त्रणा उपसमिति, प्रवक्ता धनञ्जय पौडेल उपसंयोजक रहेको स्थान छनौट, क्याटरिंग तथा मेनु व्यवस्थापन उपसमिति तथा सहसचिव संघर्ष कोइराला र सदस्य प्रिति पाण्डे उपसंयोजक रहेको मञ्च व्यवस्थापन उपसमिति पनि गठन गरिएको कार्यक्रम संयोजक भण्डारीले जानकारी दिए ।
कार्यक्रममा नेपाली काँग्रेसको तर्फबाट प्रतिनिधि सभा सदस्यमा निर्वाचित संघीय सांसद जीवन परियार, प्रदेश सांसद सरस्वती गुरुङ, विन्दुकुमार थापा, प्रकाश बराल र नेपाली काँग्रेस संसदीय दलका नेता सुरेन्द्र पाण्डेलाई विशेष सम्मान गरिने प्रवक्ता धनञ्जय पौडेलले जानकारी दिए ।
