पोखरा । नेपाली काँग्रेस पोखरा नगरसमितिले आँउदो फागुन २२ गते प्रतिनिधि सभा सदस्य तथा गण्डकी प्रदेश सभा सदस्यमा निर्वाचित सभासदहरुका लागि विशेष सम्मान कार्यक्रमको आयोजना गर्ने भएको छ ।
सभापति सुरेन्द्रमान विजुक्छेको सभापतित्वमा हालै बसेको बैठकले कार्यक्रम आयोजना गर्ने निर्णय गरेको हो ।
कार्यक्रममा गएको मंसिर ४ गते सम्पन्न प्रतिनिधि सभा र प्रदेश सभाको निर्वाचनमा कास्की जिल्लाबाट नेपाली काँग्रेसतर्फबाट विजयी सभासदहरुलाई सम्मान गरिने सभापति विजुक्छेले बताए ।
कार्यक्रम भव्य रुपमा सम्पन्न गर्नकालागि नगरसमितिका उपसभापतिद्धय प्रयागराज भण्डारी संयोजक र भवसागर बराल सह संयोजक रहेको तयारी उपसमिति गठन गरिएको छ भने सदस्यहरुमा टुवराज बाँस्तोला, गणेशबहादुर थापा, धनञ्जय पौडेल, संघर्ष कोइराला, अम्बिका ढुंगाना, प्रिति पाण्डे र रीता गुरुङ रहेकाछन् ।
यसैगरी सचिव टुवराज बाँस्तोला उपसंयोजक रहेको अर्थ संकलन उपसमिति, कार्य सम्पादन समिति सदस्य रीता गुरुङ उपसंयोजक रहेको प्रचारप्रसार र निमन्त्रणा उपसमिति, प्रवक्ता धनञ्जय पौडेल उपसंयोजक रहेको स्थान छनौट, क्याटरिंग तथा मेनु व्यवस्थापन उपसमिति तथा सहसचिव संघर्ष कोइराला र सदस्य प्रिति पाण्डे उपसंयोजक रहेको मञ्च व्यवस्थापन उपसमिति पनि गठन गरिएको कार्यक्रम संयोजक तथा उपसभापति प्रयागराज भण्डारीले जानकारी दिए ।
कार्यक्रममा नेपाली काँग्रेसको तर्फबाट प्रतिनिधि सभा सदस्यमा निर्वाचित संघीय सांसद जीवन परियार, प्रदेश सांसद सरस्वती गुरुङ, विन्दुकुमार थापा, प्रकाश बराल र नेपाली काँग्रेस संसदीय दलका नेता सुरेन्द्र पाण्डेलाई विशेष सम्मान गरिने प्रवक्ता धनञ्जय पौडेलले जानकारी दिए ।
