पोखरा, पोखराको सबै भन्दा पुरानो सामुदायिक क्याम्पस पोखरा बहुमुखी क्याम्पसले शैक्षिक उत्कृष्टताको प्रतीक मानिने ‘गुणस्तर प्रत्याभूति तथा प्रत्यायन’ (क्यूएए) प्रमाणपत्र प्राप्त गरेको छ । त्रिभुवन विश्वविद्यालयबाट सम्बन्धन प्राप्त पोखरा बहुमुखी क्याम्पसले विश्वविद्यालय अनुदान आयोगद्वारा तोकिएका विविध मापदण्ड सफलतापूर्वक पूरा गर्दै जेठ २१ गते औपचारिक रूपमा यो मान्यता प्राप्त गरेको हो ।

२०४४ सालमा स्थापना गरिएको पोखरा बहुमुखी क्याम्पसलाई पोखराको पहिलो सामुदायिक क्याम्पसको रुपमा चिनिन्छ। २०४४ सालमा पोखराको पुरानो टूडिखेल स्थित राष्ट्रिय उच्च माविको भवनमा कक्षा संचालन शुरु गरिएको पोखरा बहुमुखी क्याम्पस २०५९ सालदेखि पोखराको नयाबजारस्थित महेन्द्र माविको भवनमा स्थानान्तरण गरेर संचालनमा आएको थियो। लामो आरोह र अबरोह पछि २०७९ मा कलेजको आफ्नै भवन पोखरा -९ शान्तिबन नजिक निर्माण गरिएपछि भने पोखरा बहुमुखी क्याम्पसले  आफ्नै भवनबाट सबै किसिमको पढाई संचालन गरिरहेको क्याम्पस प्रमुख शिशुकला पराजुलीले गुरुकुल खबरलाई जानकारी दिईन ।

भौतिक पुर्बाधारको अभावमा शैक्षिक गुणस्तरसमेत वृद्धि हुन नसकेको बिगतको अबस्थामा पछिल्लो समय क्याम्पसले धेरै सुधार समेत गरेको छ। क्याम्पसमा हाल करिब ५ सय जना बिद्यार्थीहरुको साथै २१ जना शिक्षक प्राध्यापक र ६ जना कर्मचारी रहेको क्याम्पस प्रमुख पराजुलीले बताईन। शुरुवातमा आइकम र आइएको कक्षा संचालन गरेको पोखरा बहुमुखी क्याम्पसले हाल स्नातक तहमा मानविकी तथा व्यवस्थापन संकायका बिबिएस र बिएको कक्षा संचालन गर्दै आएको र आगामी दिनमा बीबीए, बीआईएम, बीआईटीजस्ता कार्यक्रम थप गर्ने योजना अगाडि सारेको बुझिएको छ ।

क्याम्पसको भवन निर्माणका लागि तत्कालीन सञ्चालक समिति अध्यक्ष नरेन्द्रमान लालचनको ५० लाख रुपैयाँ सहयोग निर्णायक बनेको थियो । पोखरा महानगरपालिकाले आवश्यक जग्गा उपलब्ध गराएको र निजी क्षेत्रका सहयोगदाताको चन्दा तथा जनसहयोगमा अहिलेको भौतिक पूर्वाधार निर्माण भएको हो ।