पोखरा, ६८ औं राष्ट्रिय सहकारी दिवसको सन्दर्भमा पोखराको फेवातालको सिरान पामे बजारमा रहेको पामे बचत तथा ऋण सहकारीले पामे  बजारमा सरसफाई कार्यक्रम गरेको छ ।सहकारीका सदस्य सहित स्थानीय सर्बसाधारण मिलेर सरसफाइ गरेका हुन् । सरसफाइ अभियानमा फेवा क्लब पामे, फेवा आमा समुह पामे, सिर्जनशिल आमा समुह पामे, प्रहरी चौकी पामे लगाएतको सक्रिय सहभागीता रहेको थियो ।

मर्यादीत सहकारी, समुउन्नत समाज भन्ने मूल नाराका साथ ६८ औं राष्ट्रिय सहकारी दिवस विभिन्न कार्यक्रमका साथ मनाइंदैछ ।

पामे बजार फेवातालका मुहान क्षेत्रका साथै पर्यटकीय स्थल भएका कारण पनि सरसफाइमा ध्यान दिदै आफुहरुले सरसफाइ गरेको पामे सहकारीका अध्यक्ष नवराज पराजुलीले जानकारी दिए । उनले सहकारीले विभिन्न समयमा सामाजिक काम समेत गर्दै आएको बताए ।

पामे बजारको सडक र आसपासमा रहेका प्लाष्ट्रिक, बोतल लगाएतका फोहोरहरु संकलन गरि ब्यबस्थापन गरिएको सहकारीका व्यवस्थापक सुर्यमोहन पराजुलीले बताए । उनले पामे बजारलाई सधै सफा राख्नु पर्ने बताउदै बजारको फोहोर फेवातालमा जाने भएकाले पनि सफा राख्न आबश्यक रहेको उल्लेख गरे ।

१ हजार १० जना शेयर सदस्य रहेको पामे सहकारीको अधिकृत पुँजी १५ करोड, चुक्ता पुँजी १० करोड १० लाख रहेको छ । आर्थिक वर्ष २०८०/८१ मा १७ करोड ९ लाख ७८ हजार निक्षेप संकलन गरी २५ करोड ४ लाख १६ हजार कर्जा प्रवाह गरेको सहकारीले जनाएको छ ।