काठमाडौँ, बीमा प्राधिकरणको अध्यक्षमा शरद ओझा नियुक्त भएका छन् । सोमबार बसेको मन्त्रिपरिषद् बैठकले बीमा क्षेत्रको नियामक निकायको रुपमा रहेको प्राधिकरणमा ओझालाई नियुक्त गर्ने निर्णय गरेको हो ।
यसअघि सोमबार नै प्राधिकरणको अध्यक्ष छनोटमा लागि गठित सिफारिस समितिले ओझासहित तीन जनाको नाम सिफारिस गरेर पठाएको थियो । त्यसरी सिफारिस हुनेहरुमा नेपाल सरकारका पूर्व सचिव रामशरण पुडासैनी र दामोदर बसौला थिए ।
नवनियुक्त अध्यक्ष ओझा पत्रकारिता तथा अध्यापन पेशामा संलग्न थिए । यसअघि १२ जनाको नाम सिफारिस भएकोमा मन्त्रिपरिषदमा पठाइएका बाहेक चिरञ्जीवी चापागाइँ र कमल रेग्मीको नाम सिफारिस गरिएको थियो ।
यीबाहेक डा। देवराज रोका, विष्णुबाबु मिश्र, बुद्धकाजी श्रेष्ठ, डिमप्रसाद पौडेल, विक्रान्त पाण्डे, रमण नेपाल र विनोदकाजी श्रेष्ठ पहिलो चरणबाटै बाहिरिएका थिए ।
नयाँ अध्यक्ष नियुक्त भएसँगै बीमा प्राधिकरणका अध्यक्ष मदन दाहाल स्वतः सञ्चाललको हैसियतमा पुगेका छन् । उनलाई अध्यक्ष नियुक्ति नभएसम्मका लागि काम गर्नेगरी जिम्मेवारी दिएर पठाइएको थियो ।
