कैलाली,  सुदूरपश्चिम प्रदेश प्रहरी कार्यालय (डिआईजी कार्यालय) धनगढीको मुख्य गेटमा रहेको डिजिटल बोर्डमा    ‘आई लभ यू चित्रा’ डिस्प्ले भएको छ। ह्याकरले उक्त बोर्ड ह्याक गरि ‘आई लभ यू चित्रा’ लेखेर सन्देश सार्वजनिक गरेको बताइएको छ।

प्रहरी कार्यलयको बोर्डमा त्यस्तो सन्देश देखिएपछि त्यसको तस्वीर सामाजिक सञ्जालमा भाइरल भइरहेको छ। यसले प्रहरी कार्यालयको साइबर सुरक्षा प्रणालीप्रति गम्भीर प्रश्न खडा गरेको छ।

प्रहरीका अनुसार घटना कसले र कसरी गर्यो भन्नेबारे अनुसन्धान भइरहेको छ। स्थानीयबासी र सामाजिक सञ्जाल प्रयोगकर्ताहरूले यस्तो कार्यलाई अनुशासनहीनता र गैरजिम्मेवारीपूर्ण भन्दै आलोचना गरेका छन्।

यसअघि पनि विभिन्न स्थानमा डिजिटल बोर्ड ह्याक गरी प्रेम प्रस्ताव राख्ने घटनाहरू सार्वजनिक भएका थिए। तर, प्रहरी कार्यालयजस्तो संवेदनशील संस्थाको बोर्ड ह्याक हुनु भने दुर्लभ र गम्भीर घटना मानिएको छ।

प्रहरीले साइबर सुरक्षालाई अझ सुदृढ बनाउन र यस्ता घटनालाई रोक्न आवश्यक कदम चाल्ने जनाएको छ।