पोखरा, राष्ट्रिय प्रजातन्त्र पार्टी (राप्रपा)की नेतृ रेखा थापाले राष्ट्रवादी आन्दोलनलाई मूर्तरुप दिन पार्टीको विशेष महाधिवेशन गर्दै नयाँ उर्जा लिएर अघि बढ्नु पर्ने सुझाएकी छन् ।

आफ्नो सामाजिक संजालमा राप्रपाको बारेमा लेख्दै उनले बिशेष महाधिबेशन गर्नुपर्नेमा जोड दिएकी हुन । यस अगाडिको संसदीय निर्बाचनमा मोरंग -३ मा उमेद्वार समेत बनेकी थापाले राप्रपा भित्रको सुस्त संगठन र पार्टीमा आकर्षणको कमी भएको बेला विशेष अधिवेशन गर्न हिचकिचाउनु नहुने उल्लेख गरेकी छन।

यस्तो कदम पार्टी तथा विचारको हितमा हुने लोकप्रिय कलाकार तथा राप्रपा कार्यसम्पादन समिति सदस्यसमेत रहेकी थापाको धारणा छ ।

‘पार्टी प्रक्रियासम्मत ढंगबाट अघि बढ्न सकिराखेको छैन, गुट उपगुट मौलाएको छ । संगठन सुस्त छ, आकर्षणमा कमी छ, यस्तो बेलामा विशेष महाधिवेशन गरेर नयाँ उर्जाका साथ अघि बढ्न सके राष्ट्रवादी आन्दोलनले मूर्तरुप लिन्छ । पार्टी र विचारको हित हुन्छ,’ मंगलबार  थापाले भनेकी छन् ।  पार्टी जीवनमा यस्तो निर्णय लिन हिचकिचाउनु नहुने उनको भनाइ छ ।