पोखरा, संयुक्त राष्ट्रसंघका महासचिव एन्टोनियो गुटेरेस पूर्वनिर्धारित समयभन्दा २ घन्टा ढिलो गरी बुद्ध जन्मस्थल लुम्बिनी पुगेका छन् । उनलाई त्यहाँ प्रधानमन्त्री पुष्पकमल दाहाल प्रचण्डले स्वागत गरे ।
तीन दिने औपचारिक नेपाल भ्रमणमा आएका गुटेरेस पोखराबाट लुम्बिनी पुगेका हुन् । मायादेवी मन्दिर, बुद्धजन्म स्मारक, पुष्पकरणी पोखरी, अशोक स्तम्भहरुको निरीक्षणपछि मायादेवी मन्दिर र अशोक स्तम्भ परिसरकै पिपलको रुखमुनि गुटेरेसलाई स्वागत गर्ने कार्यक्रम छ ।
गुटेरेस अन्नपूर्ण आधार शिविर बेसक्याम्प पुगेर लुम्बिनी गएका हुन् । उनले अन्नपूर्ण आधार शिविरमा जलवायु परिवर्तनको असरबारे प्रत्यक्ष अनुभव गर्न र स्थानीयसँग कुराकानी गरेका थिए ।
नेपाली सेनाको हेलिकोप्टर मार्फत आधार शिविर पुगेका उनलाई स्थानीय झाँकी सहित स्वागत गरिएको छ । गाउँपालिकाका अध्यक्ष विष्णुबहादुर केसी सहितको टोलीले गुटेरेसलाई स्वागत गरेको थियो ।
पालिका अध्यक्ष केसीले जलवायु परिवर्तनका समग्र असरबारे जानकारी गराएका थिए भने वडाध्यक्ष गुरुङले सानोमा खर्कमा पशु चराउन जाँदाको अनुभव बाँडे । महासचिव गुटेरेसले विकसित देशका कारण जलवायु परिवर्तन भएको बताए । नेपालको समस्याबारे अन्तर्राष्ट्रिय फोरममा कुरा उठाउने पनि उनले बताए ।
यसअघि सोमबार दिउँसो दोस्रो पटक पोखरा ओर्लिएपछि उनलाई पोखरेली भव्य स्वागत गरेका थिए । २ बजे फिस्टेल लज पुगेपछि उनका औपचारिक कार्यक्रम तय थिएनन् । महासचिव गुटेरेसकै इच्छामा नयाँ कार्यक्रम तय भए । उनी केही समय आराम गरेपछि पोखरा २२ पुम्दीभुम्दी पुगे । गुटेरेसले सोमबार दिउँसो पुम्दीकोटबाट पोखरा उपत्यका, हिमाल र फेवाताल नियालेका थिए । गुटरेसले आजै नेपालको संसदलाई चार बजे सम्वोधन गर्ने कार्यक्रम छ ।
