पोखरा, पोखराको फिर्केखोला मिचेर बनेका संरचना हटाउन पोखरा महानगरपालिकाले ३५ दिने सूचना जारी गरेको छ । शुक्रबार सूचना जारी गरी खोलाघर मिचेर बनेका स्थायी÷अस्थायी सबै संरचना हटाउन महानगरले निर्देशन दिएको हो । सूचनामा ३५ दिन भित्र पूर्णरुपमा हटाउनु पर्ने र नहाएमा महानगरपालिका आफैले हटाउने र महानगरले हटाउनु परेमा लागत समेत सम्बन्धित व्यक्ति वा संस्थाले तिर्नु पर्ने सूचनामा उल्लेख छ ।

फिर्केखोलाको खोलाघर नापजाँच सम्बन्धी प्राविधिक समितिले केही दिन पहिले प्रतिवेदन महानगरपालिकालाई बुझाइएको थियो । “फिर्केखोलाकोे खोलाघर नापजाँच प्रतिवेदन–२०८०” प्राविधिक समितिका संयोजक वासुदेव पौडेलले नगर प्रमुख धनराज आचार्य, उपप्रमुख मन्जुदेवि गुरुङ र प्रमुख प्रशासकीय अधिकृत श्यामकृष्ण थापालाई बुझाएका थिए ।

खोलाघर माथी स्थायीदेखी अस्थायी प्रकृतिका १६० संरचनाहरु निर्माण गरेको प्रतिबेदनमा छ । फिर्केखोला नै मिचेर ९७ वटा अस्थायी संरचनाहरू र ३५ वटा स्थायी संरचनाहरू निर्माण गरेको पाइएको छ । खोलामाथी १० अस्थायी र १८ वटा स्थायी प्रकृतिका संस्थागत संरचनाहरु निर्माण गरिएका छन् । फिर्केलाई व्यक्तिगतमात्रै नभएर संस्थागत तरिकाले पनि अतिक्रमण गरिएको प्रतिवेदनमा समावेश छ ।