पोखरा, संविधान सभा अध्यक्ष एवम् नेकपा एमालेका उपाध्यक्ष सुवास नेम्वाङको हृदयघातबाट निधन भएको छ । नेम्वाङको आज बिहान निधन भएको थियो ।
गएराति बालुवाटारस्थित निवासमा बेहोस भएका नेम्वाङलाई त्रिवि शिक्षण अस्पताल पु¥याइएकोमा चिकित्सकले मृत घोषणा गरेका थिए । उनको पार्थिव शरीर त्रिवि शिक्षण अस्पतालबाट निकालिएको छ ।
लगत्तै पार्थीव शरीरलाई नेपाली सेनाको टोलीले नेकपा एमालेको केन्द्रीय कार्यालय च्यासल ल्याएको छ । त्यहाँ उनीप्रति श्रद्धाञ्जली अर्पण गर्ने कार्य जारी रहेको छ ।
बिहान बसेको मन्त्रिपरिषद्को आकस्मिक बैठकले नेम्वाङलाई राजकीय सम्मानसहित अन्त्येष्टि गर्ने र अन्त्येष्टिको दिन सार्वजनिक बिदा दिने घोषणा गरेको छ । मन्त्रिपरिषद्को निर्णयपछि नेम्वाङको शव व्यवस्थापनको जिम्मा नेपाली सेनाले लिएको छ ।
संविधान सभा अध्यक्ष नेम्वाङका छोराहरु विदेशमा भएकाले उनीहरु फर्किएपछि अन्त्येष्टिको दिन निश्चित हुने छ । यद्यपि २८ गते मुन्धुम सँस्कृतिअनुसार अन्त्येष्टि गर्ने तयारी छ । उनको अन्त्येष्टि हुने दिन सार्वजनिक विदा हुने जनाइएको छ ।
सोमबार राति नेम्वाङ बालुवाटारस्थित निवासमै सुतिरहेका थिए । मध्यरातितिर उनी शौचालय गए तर परिवारका सदस्यले उनलाई राति १ बजेतिर शौचालयमै लडेको अवस्थामा भेट्टाउँदा उनी बेहोस् भएको बताइएको छ । त्यसपछि हतार हतार उनलाई महाराजगन्जस्थित त्रिवि शिक्षण अस्पताल पुर्याइयो।
‘तर त्यहाँ पुग्दासम्म लभगभ उहाँको मृत्यु भइसकेको थियो’, एमाले स्थायी कमिटी सदस्य शेरबहादुर तामाङले भनेका छन् ।
एमाले नेता तामाङका अनुसार नेम्वाङलाई मृत घोषणा गर्दा रातको त्यस्तै साढे १ वा २ बजेको थियो ।
