पोखरा, जुम्लामा जिप दुर्घटना हुँदा दुई जनाको मृत्यु भएको छ भने काठमाडौंको पेप्सीकोला–काँडाघारी सडकखण्डमा सवारी दुर्घटना हुँदा सात जना घाइते भएका छन् ।

आइतबार बिहान पौने ७ बजे नाग्म गमगड राजमार्गको कनकासुन्दरी–४ स्थित ठगुनेरामा भे १ ज १०९९ नम्बरको जिप दुर्घटना हुन पुगेको प्रहरीले जानकारी दिएको छ । उक्त दुर्घटनामा चालक र सहचालकको मृत्यु भएको जिल्ला प्रहरी कार्यालय जुम्लाका सूचना अधिकारी प्रहरी निरीक्षक उमेश चन्दले जानकारी दिए ।

मृतकको पहिचान भएको छैन । प्रहरी निरीक्षक चन्दका अनुसार गुठीज्यूलाबाट मुगु जादै गरेको उक्त जिपमा अन्य यात्रु थिएनन् । जिप सडकबाट करिब तीन सय मिटर तल खसेको छ ।

यसैगरी काठमाडौंको पेप्सीकोला–काँडाघारी सडकखण्डमा मिनी बसले बोलेरो, मोटरसाइकल र स्कुटरलाई ठक्कर दिँदा सात जना घाइते भएका हुन् । घाइतेहरुको मिनभवनस्थित सिभिल अस्पताल र मदरल्याण्ड अस्पतालमा उपचार भइरहेको काँडाघारी प्रहरीका इन्सपेक्टर श्याम कटुवालले बताए ।

सडकमा गुडिरहेको बा ३ ख ४८४८ नम्बरको बसले विपरीत दिशामा रहेका बा ६ च ५३४२ नम्बरको बोलेरो जिप, बागमती प्र ०२–०४१ प ४८३८ नम्बरको मोटरसाइकल र बागमती प्रदेश ०२–०३७ प ५३११ नम्बरको स्कुटरलाई ठक्कर दिएको थियो । दुर्घटना आज बिहान करिब ७ः४५ बजेतिर भएको हो ।