कस्तो होला त्यो लोक?
सोचीरहन्छु
आफ्नो आफन्त
घर-परिवार
बालबच्चा टुहुरो पारेर
एक्लै
यात्रामा निस्कनेहरु
कहॅा जान्छन् होला ?
सबै सबै छाडी सुटुक्क जाने
त्यो ठॅाउ कस्तो होला ?
भन्छन्-
देवलोक गए
स्वर्गलोक गए
सोचीरहन्छु-
स्वर्गमा घर कस्तो होला ?
आगन कस्तो होला?
देव-देवी रहने
त्यो देवलोक कस्तो होला?
भन्छन्-
स्वर्णिम फूलहरुको बगैचा हुन्छ
अप्सराहरुको राज्य हुन्छ
सोचीरहन्छु
प्रियजन नै छाडेर जाने
प्रियजनको याद नै विर्साईदिने
त्यो राज्य कस्तो होला?
त्यो जीवन कस्तो होला?
गुरुङ शास्त्र भन्छ
एक थोक छरी नौ थोक फल्ने
बिहान रोपे सॅाझ फल्ने
सुखै सुख
र आनन्दै आनन्दको लोक “सिमी नास”
सोचीरहन्छु
शान्ति र आनन्द मात्रै हुने
सॅाच्ची त्यो लोक कस्तो होला?
सोचीरहन्छु
छाडीजाने आफ्नाको पिडामा
रोई रोई थाकेका
सिकिस्त आखा
बिछोडको प्रहारले
कलेटी परेका ओठ
कॅाचुली फेर्न नसकेको
खुशी
कुनै कुराको पर्वाह नगरी
माया, ममता,मान प्रतिष्ठाको
वेपर्वाह गर्दै
एकपटक पनि फर्केर नहेर्ने
त्यो लोक कस्तो होला?
एकपटक पनि फर्केर नआउने
त्यो लोक कस्तो होला??
मिस यू आमा💔
रीता गुरुडं
स्याड्ंजा ( हाल- पोखरा १४ चाउथे )
प्रतिक्रिया लेख्नुहोस्:-