नेपाली कांग्रेसद्वारा कोजाग्रत पूर्णिमाका दिन आयोजना गरिदै आएको शुभकामना आदान–प्रदान तथा चियापान कार्यक्रम यस वर्ष नगरिने भएको छ ।
वि.सं. २०३३ सालमा जननायक बी.पी. कोइराला राष्ट्रिय एकता तथा मेलमिलापको नीति लिई स्वदेश फर्केपछि २०३४ सालदेखि प्रत्येक वर्ष नेपाली कांग्रेसले कोजाग्रत पूर्णिमाको दिनमा चियापान कार्यक्रम गरी शुभकामना आदान–प्रदान गर्दै आएको थियो ।
बर्षेनी यो परम्परा चल्दै आएको भएपनि यस वर्ष आगामी मंसिर ४ गते हुने प्रतिनिधि सभा र प्रदेश सभा सदस्य पदको निर्वाचनका लागि कोजाग्रत पूर्णिमाकै दिन अर्थात असोज २३ गते नै प्रत्यक्ष निर्वाचन प्रणाली अन्तर्गत उम्मेदवारहरुको मनोनयन गर्नुपर्ने भएकोले चियापान तथा शुभकामना आदान प्रदान कार्यक्रम नगरिने नेपाली कांग्रेसका मुख्य सचिव कृष्ण प्रसाद पौडेलले जानकारी दिएका छन ।
कास्की कांग्रेसले भने दशै पर्व सकिएपछि र तिहार आउनु अगाडी नै जिल्ला स्तरमा चियापान र शुभकामना आदान प्रदान कार्यक्रम गर्ने निर्णय यस अगाडी बसेको नेपाली कांग्रेस कास्की जिल्ला कार्यसमितिको बैठकले गरेको छ ।
