गण्डकी प्रदेशमा झण्डै ४ दशकपछि आयोजना हुन गईरहेको नवौं राष्ट्रिय खेलकुद प्रतियोगिताको समुद्घाटन सम्मानीय राष्ट्रपति विद्यादेवी भण्डारीबाट हुने तय भएको छ ।
राष्ट्रपति निवासमा गएर राखेपका अध्यक्ष एंव युवा तथा खेलकुद मन्त्री महेश्वरजंग गहतराजले राष्ट्रपतिलाई निमन्त्रणा पत्र प्रदान गरेका हुन् ।
सोही अवसरमा राखेपका उपाध्यक्ष शिव कोइराला, सदस्य सचिव टंकलाल घिसिङ र सदस्य दिपेन्द्र विष्टको समेत उपस्थिति रहेको थियो ।
त्यस्तै आयोजक राखेपले यस प्रतियोगितामा सहभागी हुने खेलाडी, निर्णायक, प्रशिक्षक, व्यवस्थापक, कर्मचारी, अफिसियल लगायत गरी ९ हजार जनाको बिमा गर्ने भएको छ ।
बिमाका लागि राष्ट्रिय बिमा कम्पनीका प्रमुख कार्यकारी अधिकृत शंकर अर्याल र राखेपका सदस्य सचिव घिसिङबीच मंगलबार मात्र सम्झौता–पत्रमा हस्ताक्षर भएको छ ।
सम्झौता–पत्रमा हस्ताक्षर गर्दै राखेपका सदस्य सचिव घिसिङले बिमाको अवधि १ महिनाको रहने र प्रत्येकको १० लाख रुपैँया बराबरको बिमा गरिएको जानकारी दिएका छन् ।
यस प्रतियोगिता भव्य र सभ्य रुपमा संचालन गर्नका लागि राखेपले तिव्र रुपमा आफ्ना कामहरुलाई अगाडी बढाईरहेको छ भने प्रतियोगिता गण्डकी प्रदेशमा आयोजना हुने भएकाले यस प्रदेशको प्रदेश खेलकुद परिषद्, गण्डकी प्रदेशले समेत तयारीको लागि विभिन्न चरणमा कार्य विभाजन गरि तिव्रता दिईरहेको छ । यस प्रतियोगिता आयोजना हुन अब मात्र १६ दिन बाँकी रहेको छ ।
