पोखरा,  शुक्लागण्डकी नगरपालिका–५, बेलचौतारा, तनहुँनिवासी सामाजिक अभियन्ता चन्द्रा थापामगरले एक्लै ब्याडमिण्टन प्रतियोगिताको आयोजना गर्नुभएको छ । मगर जातिको प्रमुख सांस्कृतिक चाड माघे संक्रान्तिको पूर्व सन्ध्यामा सामाजिक अभियन्ता चन्द्राले विभिन्न स्पर्धामा ब्याडमिण्टन प्रतियोगिताको आयोजना गर्नुभएको हो ।

जसमा महिला ए तर्फ आयोजक चन्द्रा थापामगर र खोमाया थापामगरले प्रतियोगिताको उपाधि जित्न सफल भए । त्यस्तै, जमुना पन्त र सुकमाया गुरुङको जोडी उपबिजेता बन्यो । महिला बी तर्फ गंगा रानामगर र विमला थापामगरको जोडीले उपाधि जित्न सफल भयो भने पविता आलेमगर र सरस्वती रमौलीमगरको जोडी उपबिजेता बन्यो ।

त्यसैगरी, पुरुष ए तर्फ चितवनका विधान गुरुङ र कृष्ण सापकोटाको जोडीले उपाधि जित्न सफल भयो । पोखराका सुशील गिरी र कृष्ण बस्नेतको जोडी उपबिजेता बन्यो भने क्रमशः डोलराज आलेमगर र सरोज गुरुङ तथा सुमन श्रेष्ठ र थम रानामगरको जोडी तृतीय भयो ।

पुरुष बी तर्फ सफल भुजेल र विवेक न्यौपानेको जोडीले उपाधि जित्यो भने सागर थापामगर र पोटबहादुर सारूमगरको जोडी उपबिजेता बन्यो । त्यस्तै, क्रमशः रेख श्रेष्ठ र विष्णु रानामगर तथा कुमार गुरुङ र शशांक गुरुङको जोडी तृतीय भयो ।

प्रतियोगिताका बिजेता तथा उपबिजेता खेलाडीहरूलाई नगद पुरस्कारसहित ट्रफी, मेडल र प्रमाणपत्र प्रदान गरिएको थियो । कार्यक्रमका प्रमुख अतिथि नेपाल मगर संघ, तनहुँका अध्यक्ष एवं जिल्ला खेलकुद विकास समिति, तनहुँका पूर्व उपाध्यक्ष मनिराज थापामगर, शुक्लागण्डकी नगरपालिका वडा नं. ६ का वडा सदस्य बुद्धिबहादुर थापा र नेपाल आदिवासी जनजाति पत्रकार महासंघ (फोनिज), गण्डकी प्रदेशका महासचिव रूद्रबहादुर श्रीसमगरले पुरस्कार वितरण गर्नुभयो ।

कार्यक्रमका बोल्दै प्रमुख अतिथि एवं नेपाल मगर संघ, तनहुँका अध्यक्ष मनिराज थापामगरले एक्लै यति ठूलो प्रतियोगिता आयोजना गर्नु सहज विषय नभएको भन्दै चन्द्रा थापामगर साहसी महिला भएको बताउनुभयो । एक्लो प्रयासमा पनि सबैको साथले केही गर्न सकिन्छ भन्ने उदाहरण यो प्रतियोगिता भएको उहाँको भनाइ थियो ।

त्यसैगरी, आयोजक सामाजिक अभियन्ता चन्द्रा थापामगरले आफू पनि ब्याडमिण्टनको खेलाडी भएको र खेलका माध्यमबाट मगर समुदायको प्रमुख सांस्कृतिक चाड माघे संक्रान्तिको प्रवद्र्धनका लागि प्रतियोगिताको आयोजना गर्ने सोंच पलाएको बताउनुभयो ।

नेपाल मगर संघ, शुक्लागण्डकी नगर समिति, तनहुँका अध्यक्ष सुमन आलेमगरको अध्यक्षतामा भएको कार्यक्रमको सञ्चालन चन्द्रा थापामगर र देव गुरुङले गर्नुभएको थियो । सो अवसरमा प्रतियोगिता सम्पन्न गर्न सहयोग गर्ने आर्थिक सहयोगदातासहित अम्पायर तथा सहयोगीलाई सम्मान समेत गरिएको थियो । शुक्रबारदेखि आयोजित प्रतियोगिता शनिबार सम्पन्न भएको हो ।