प्रजातन्त्र सेनानी स्व. नारायणदत्त–दुर्गाकुमारी रानाभाट स्मृति कोषबाट रक्त क्यान्सर पीडित दिप्तीले आर्थिक सहयोग पाएकी छन्।

पोखरा–३१ मोहरियामा स्मृति कोषले एक कार्यक्रम गरि द्विप्तीको बुवा देव बहादुर सापकोटालाई २५ हजार ५ सय ५५ रुपैयाँको चेक स्मृति कोषका अध्यक्ष देवेन्द्र रानाभाटले हस्तान्तरण गरेका थिए।

कार्यक्रममा बोल्दै अध्यक्ष रानाभाटले रक्त क्यान्सर पीडित द्विप्ती सापकोटाको उपचारको लागि आफूले एउटा सानो सहयोग गरेको र आवश्यक परेको खण्डमा संस्थागत तथा व्यक्तिगत रुपमा थप सहयोग गर्दै जाने बताए।

पोखरा–२६ साँघुको मुखमा कार्यालय रहेको स्व.नारायणदत्त–दुर्गाकुमारी रानाभाट स्मृति कोषमा ६ लाख ६६ हजार ६ सय रुपैयाँ रहेको छ। उक्त रकमको ब्याजबाट हरेक वर्ष १०+२ का उत्कृष्ट १ छात्र र १ छात्रालाई नगद, प्रमाण पत्र र दोसल्ला प्रदान गर्ने गरिएको छ भने दुर्गा कुमारी रानाभाट क्यान्सरकै कारण निधन भएको हुँदा हरेक वर्ष १ जना क्यान्सर पीडितलाई २५ हजार ५ सय ५५ रुपैयाँ सहयोग गर्दै आइरहेको अध्यक्ष रानाभाटले जानकारी गराए।

स्व.नारायणदत्त रानाभाटका ४ छोरा र २ जना छोरी रहेका छन्। जसमा पूर्व सभामुख तारानाथ रानाभाट, खिलेन्द्र रानाभाट, जिल्ला कार्यसमिति काग्रेसका सचिव देवेन्द्र रानाभाट र शुवेन्द्र रानाभाट रहेका छन् भने छोरीहरुमा खेमकुमारी रानाभाट र शिवकुमारी सापकोटा रहेका छन्। स्व.नारायणदत्त रानाभाटकी बुहारी स्व. दुर्गा रानाभाटका श्रीमान् शुवेन्द्र रानाभाट र १ जना छोरा रहेका छन्।

पारिवारीक आर्थिक अवस्था कमजोरका कारण असार १ गते देखी क्षेत्रिय अस्पतालको बच्चा वार्डमा उपचार गराईरहेकी बालिकाको उपचारमा समस्या आएको थियो। द्विप्तीलाई बचाउनको लागि सहयोग गर्न भन्दै डा. रामचन्द्र बास्तोलाले आफ्नो सम्पर्कमा रहेका केही साथीहरुलाई म्यासेन्जर मार्फत र केही अनलाईनले समाचार प्रकाशन गरेपछि अभियान शुरु भएको थियो । अहिले द्विप्तीलाई थप उपचारको लागि काठमाण्डौंको कान्तिबाल अस्पतालमा राखिएको छ।