काठमाडौँ, काठमाडौँको त्रिपुरेश्वस्थित राहदानी बिभाग अगाडी एउटा बसमा आगलागी भएको घटनामा घाइते भएका चालकको अबस्था गम्भीर रहेको छ। उपत्यका ट्राफिक प्रहरी कार्यालयका प्रवक्ता एसपी नरेश सुवेदीका अनुसार, ऋद्धिसिद्धि यातायातकोबा ५ ख ४२७४ नम्बरको उक्त बस मूलपानी देखि थानकोट रुटमा चल्ने गरेको हो । गाडीमा आगो लाग्दा बसमा चालक दावा लामा मात्र रहेकोमा उनी पनि गम्भीर घाइते भएका र उपचारका लागि अस्पताल पठाइएको प्रहरीले जानकारी दिएको छ ।
घाइते भएका चालक २५ वर्षीय दावा लामाको अवस्था निकै गम्भीर छ । उनलाई उपचारका निम्ति कीर्तिपुर बर्न अस्पतालमा पठाइएको थियो।अस्पतालका निर्देशक निदिना ताम्राकारका अनुसार बस चालकको अवस्था निकै गम्भीर छ । उनले भनिन्, “अवस्था निकै गम्भीर छ । शरीरका अधिकांश भाग जलेको छ ।” आगो लाग्दा चालक लामा बसभित्रै थिए । उनैले आगो लगाएको प्रहरीको आशंका गरेको भएपनि अनुसन्धान जारी छ ।
कतिपयले चालक आफैँले आगो लगाएको हुन सक्ने आशंका प्रकट गरेका छन । जिल्ला प्रहरी परिसर काठमाडौंका एसपी दानबहादुर थापाले दिएको जानकारी अनुसार बसमा आगो लागेपछि प्रहरीले उद्धार गरी उनलाई अस्पताल पुर्याइएको थियो । आगो लाग्दा बसको मुख्य ढोका र चालक सिटपट्टिको ढोका पनि बन्द रहेको थियो । ढोका फोडेर उनको उद्धार गरिएको एसपी सुवेदीले जानकारी दिए ।
बसमा लागेको आगो निभाउने प्रयास गरिएको भएपनि प्रहरीले आगो निभाउने प्रयास गर्दा झन्झन् दन्किँदै थियो । बसमा लागेको आगो उक्त स्थान नजिकैको विद्युत्, टेलिफोन र इन्टरनेटका तारमा समेत सल्किएको थियो । आगो निभाउने प्रहरीको प्रयास सफल नभएको कारण करिब २० मिनेटपछि काठमाडौं महानगरपालिकाको एउटा दमकल घटनास्थलमा आइपुगेको थियो ।
दमकल आइपुगे पनि करिब १० मिनेट त्यसले पानी फ्याँक्न सकेन । अग्निनियन्त्रकले दमकलको पाइपबाट पानी फ्याँक्ने प्रयास गरेका थिए । तर, दमकलले पानी फ्याँक्न नसकेको र त्यति नै बेला घटनास्थलमा नेपाली सेनाको दमकल आइपुगेको थियो । त्यसपछि मात्र काठमाडौं महानगरपालिकाको दमकलबाट पानी फ्याँक्न सम्भव भयो । सँगै सेनाको दमकलको समेत सहायतामा बसमा लागेको आगो निभाउन सुरु गरिएको थियो । बसमा लागेको आगो लगभग आफैँ निभ्ने अवस्था भएको बेलामा त्यहाँ रहेका दुईवटा दमकलको समेत सहयोगमा आगो निभाइएको थियो ।
महानगर प्रहरी बलका डीएसपी लीलाराज गाछा थापामगरले सुरुमा महानगरको दमकलको एक्सेलेटरमा समस्या आएर पानी फ्याँक्न नसकेको स्पष्ट पारे । एक्सेलेटर थिचेपछि वाटर पम्पबाट पानी जानुपर्थ्यो, केही बेर गएन । हामीले उत्तिखेरै बनायौँ र आगो निभाउन सुरु गरेका थियौँ ।” उनले भने ।
