पोखरा, गएको असोज २७ गते सोलुखुम्बुमा मनाङ एयरको हेलिकप्टर दुर्घटना हुँदा घाइते भएका पाइलट प्रकाश सेढाईंको उपचारको क्रममा निधन भएको छ ।
भारतको मुम्बइस्थित नेसनल बर्न सेन्टरमा मंगलबार उनको निधन भएको वायु सेवा सञ्चालक संघका प्रवक्ता योगराज कडेलले पुष्टी गरे ।
मनाङ एयरले क्याप्टेन सेढाईंकोको निधनले एक कुशल पाइलट तथा सक्षम व्यवस्थापक गुमाएको भन्दै उनीप्रति हार्दिक श्रद्धाञ्जली व्यक्त गरेको छ ।
गत शनिबार बिहान सोलुखुम्बुको लोबुचेमा दुर्घटनग्रस्त भएको मनाङ एयरको हेलिकप्टर दुर्घटनका क्रममा आगलागि भएको थियो । दुर्घटनापछि घाइते भएका क्याप्टेनलाई तत्काल उद्धार गरी धुम्बराईस्थित ह्याम्स अस्पताल ल्याइएको थियो ।
परिवार तथा चिकित्सकको सल्लाहपछि उनलाई थप उपचारका मुम्बईस्थित नेसनल बर्न सेन्टर लगिएको थियो । त्यहीँ उपचारको क्रममा उनको निधन भएको नागरिक तथा उड्डयन प्राधिकरणले जनाएको छ । प्राधिकरणले क्याप्टेन सेढाइँको निधन प्रति गहिरो दुःख समेत व्यक्त गरेको छ ।
शनिबार बिहान लुक्लाबाट बिहान ७ बजेर १३ मिनेटमा सोलुखुम्बुमा पर्यटक लिन गएको मनाङ एयरको ९ एन–एएनजे कलसाइनको हेलिकप्टर अवतरण गर्ने बेला दुर्घटनामा परेको थियो ।
