पोखरा, खाना पकाउने एलपी ग्याँसमा भारि मूल्य वृद्धि भएको छ । नेपाल आयल निगमले खाना पकाउने ग्यासको मूल्यमा एकैपटक प्रतिसिलिण्डर २३५ रुपैयाँले मूल्य बढाएको हो ।

अन्य इन्धनमा पनि पुनः मूल्य वृद्धि हुन पुगेको छ । समायोजित मूल्यअनुसार ग्यासको मूल्य प्रतिसिलिन्डर अब एक हजार ८९५ रुपैयाँ कायम भएको छ। यसअघिको मूल्य १६६० रुपैयाँ थियो । बढेको मूल्य शुक्रबारदेखि लागू हुने निगमले उल्लेख गरेको छ ।

निगमले इण्डियन आयल कर्पोरेसनबाट बढेर मूल्य आएकोले सोहीअनुसार समायोजन गरिएको बताएको छ । पेट्रोल, डिजेल र मट्टीतेलको भाउ पनि बढेको छ । पेट्रोलमा प्रतिलिटर ४ र डिजेल तथा मट्टीतेलमा ३ रुपैयाँले भाउ वृद्धि गरिएको छ ।

निगमले जारी गरेको विज्ञप्तिअनुसार आइओसीबाट पेट्रोल र डिजेलमा क्रमशः ३ रुपैया १७ पैसा र २ रुपैयाँ ४८ पैसा मूल्य बढेर आएको छ। यस्तै ग्यासमा १८६ रुपैयाँ मूल्य बढेर बढेको हो ।