पोखरा, जेनजी आन्दोलनका क्रममा काठमाडौँ लगायतका विभिन्न स्थानमा युवासहित विद्यार्थीको ज्यान गएपछि कास्की जिल्लामा संचालित निजि विद्यालयहरुले मंगलबार बिधालय बन्द रहने घोषणा गरेका छन् । निजि बिधालयको संस्था प्याब्सन कास्कीका अध्यक्ष षडानन्द गौतमका अनुसार सोमबार दिनभर प्रदर्शनका क्रममा विद्यार्थी र अभिभभावक समेत अलमलमा परेकाले मंगलबार एक दिनका लागि बिधालय बन्दको निर्णय गरिएको हो।
कास्कीमा रहेका निजी क्षेत्रका सबै विद्यालयहरु १० जोड २ र मन्टेश्वरीहरु समेत बन्द रहने उनले बताए मंगलवार एक दिन बिधालय बन्दको घोषणा गरिएपनि आगामी दिनमा के कसरि अगाडी बढ्ने सम्बन्धमा निजि बिधालयका संचालकहरुको बैठक मंगलवार नै बस्ने र निर्णय लिईने भएको छ ।
निजी क्षेत्रका शिक्षण संस्थाहरुसंग सम्बन्धित बिभिन्न संस्थाहरूले दुई दिन शोक विदा दिने घोषणा समेत गरेका छन्। एनएमए, अपेन, हिसान, नेशनल प्याब्सन र प्याब्सनले सोमबार संयुक्त विज्ञप्ति जारी गर्दै भदौ २४ र २५ गते विद्यालय बन्द गरी दिवंगतप्रति श्रद्धाञ्जली स्वरूप शोक विदा गर्ने जनाएका छन् । यसैगरी काठमाडौँ महानगरपालिकाले काठमाडौँ महानगर भित्रका सबै शिक्षण संस्थाहरु तिन दिनसम्म बन्द गर्ने सूचना सोमबार नै जारी गरिसकेको छ ।
विज्ञप्तिमा आन्दोलनका क्रममा विद्यार्थीको निधन हुनु अत्यन्त पीडादायी भएको उल्लेख गर्दै मृत आत्माप्रति श्रद्धाञ्जली र शोकसन्तप्त परिवारप्रति समवेदना व्यक्त गरिएको छ । साथै उपचाररत घाइते विद्यार्थीहरूको शीघ्र स्वास्थ्यलाभको कामना गरिएको छ । “यस अकल्पनीय घटनाले केवल शैक्षिक क्षेत्र मात्र होइन, समग्र नेपाली समाजलाई स्तब्ध बनाएको छ।” विज्ञप्तिमा भनिएको छ। “सबै पक्ष संयमित र धैर्यवान रही सामाजिक शान्ति, सद्भाव र सहिष्णुता कायम गर्न सहयोग गर्नुपर्ने आवश्यकता छ।”
