पोखरा, प्रहरीले काठमाडौंमा अबैध सुन गाल्ने कारखाना भेट्टाएको छ । न्यूरोडको सुन पसलमा छापा मारेर झण्डै ८ किलो सुन समेत प्रहरीले बरामद गरेको छ ।

उपत्यका अपराध अनुसन्धान कार्यालय, बानेश्वरको टोलीले मंगलबार राति ७ किलो ८ सय ग्राम सुनसहित ‘ओमपाल गोल्ड शप’ का सञ्चालक पदमप्रसाद पाण्डेलाई पक्राउ गरेको एसएसपी सोमेन्द्रसिंह राठौरले जानकारी दिएका छन् ।

उनले तस्करीको सुन गालेर गहना बनाएर बेच्ने गरेको प्रहरीको भनाई छ । बरामद गरिएको सुनमा केही ढिक्कामा छन् भने केही गहना समेत प्रहरीले बरामद गरेको जनाइएको छ ।कार्यालयका एसपी रवीन्द्र रेग्मीले सुन कहाँबाट ल्याइएको हो भन्ने विषयमा अनुसन्धान भइरहेको बताए ।

यसअघि प्रहरीले ३ साउनमा त्रिभुवन अन्तर्राष्ट्रिय विमानस्थलको भन्सार जाँच पार गरेर बाहिरिएको ६० किलो सुन बरामद गरेको थियो । त्यसअघि विद्युतीय सिगरेट (भेप) मा लुकाएर समेत ९ किलो सुन तस्करी भएको थियो ।

तस्करी प्रकरणहरुबारे छानबिन गर्न सरकारले उच्च अदालतका पूर्वन्यायाधीश डिल्लीराज आचार्यको नेतृत्वमा उच्चस्तरीय छानबिन समिति यसअघि नै बनाएको छ ।