पोखरा, एशियाली विकास बैंकको आर्थिक सहयोगमा मुग्लिन–पोखरा सडक सुधार आयोजना अन्तर्गत उक्त खण्डमा जारी सडक स्तरोन्नती कार्य समयमै सक्न पोखरा पर्यटन परिषद्ले माग गरेको छ ।

परिषद्को आयोजनामा तनहुँको दमौलीमा हालै भएको पत्रकार सम्मेलनमा सो माग गरिएको हो । नेपालका दुई ठूला शहर– काठमाडौं र पोखरा जोड्ने पृथ्वी राजमार्ग अन्तर्गतको उक्त खण्डलाई कम्तिमा चार लेनको बनाउने कार्य निकै महत्वपूर्ण र सराहनीय भए पनि जुन गति र स्तरमा यो सडक विस्तार कार्य अगाडि बढेको छ, यसले आम उपभोक्ता, निजी क्षेत्र र पर्यटन जगतमा थुप्रै गुनासोहरु उब्जाएको परिषद्का अध्यक्ष पोमनारायण श्रेष्ठले बताए ।

‘सडक विस्तार कार्य अगाडि बढ्नु सकारात्मक पक्ष हुँदाहुँदै पनि निर्माण पक्षबाट भएको सुस्त र अव्यवस्थित विस्तारकार्यबाट सेवाग्राहीले थुप्रै कठिनाई र झण्जटहरु भोग्दै आउनु परेको छ । छोटो दुरीको यात्राका लागि लामो समय खर्चनुपर्ने, दिक्क लाग्दो र कष्टपूर्ण यात्रा, विरामी र अशक्त यात्रुका लागि थप जोखिम तथा हैरानीको अवस्था सिर्जना हुन पुगेको छ । यतिमात्र नभई ढिलो गतिमा काम अगाडि बढ्दा लामो समयसम्म सडक वरपरका वासिन्दाले धुलो, धुँवा र ध्वनी प्रदूषणको समस्याबाट गुज्रँदै स्वास्थ्य जोखिमको सामाना गर्नु पर्ने अवस्था सिर्जना भएको छ ।’ कार्यक्रममा वितरित प्रेस विज्ञप्तिमा भनिएको छ ।

यसैगरी नेपाली अर्थतन्त्रको महत्वपूर्ण आधार मानिएको पर्यटन र उद्योग वाणिज्य क्षेत्रले समेत सुस्त र अव्यवस्थित निर्माण कार्यबाट प्रत्यक्ष प्रभावित हुनु परेको र काठमाडौं वा नारायणगढ हुँदै पोखरासम्म यात्रा गर्न चाहने पर्यटकले सिंगो दिन खर्चनुपर्ने अवस्था सिर्जना भएको विषय पनि उल्लेख गरिएको छ । काठमाडौं–पोखराविचको पाँच देखि छ घण्टा लामो बसयात्राका लागि अहिले १२ घण्टा सम्म लाग्ने गरेको छ । यसबाट पोखरा र वरपरको पर्यटनमा नकारात्मक प्रभाव परेको र निजी क्षेत्रले विक्रीयोग्य बस्तु, अन्य उत्पादन र कच्चा पदार्थ ढुवानीमा लामो समय खर्चनु परेको परिषद्ले जनाएको छ ।

विज्ञप्तिमा थप भनिएको छ, ‘खर्बौं रुपैयाँको लगानी रहेको पोखरा क्षेत्रको पर्यटनका लागि यो सुखद पक्ष होइन । औपचारिक रुपमै नेपालको पर्यटकीय राजधानी घोषणा हुन लागेको पोखराका लागि त यो झनै नकारात्मक अवस्था हो । सडक विस्तार कार्य सुरु भएको यतिका समय गुज्रँदा पनि निकै कम प्रतिशत मात्र प्रगति हुनु निरासजनक र दुःखद पक्ष हो । यो विषयमा परिषद्ले विगतमा प्रधानमन्त्री, अर्थमन्त्री, भौतिक पूर्वाधार तथा यातायात मन्त्री, पर्यटन मन्त्री, गण्डकी प्रदेश सरकारका प्रमुख तथा मुख्यमन्त्री र मन्त्रीहरुको ध्यानाकर्षण गराइसकेको अवगत गराउन चाहन्छौं ।’

मुग्लिन–पोखरा सडक खण्डको विस्तार र स्तरोन्नती कार्यलाई तिव्रता प्रदान गरी समयमै काम सम्पन्न होस् भन्ने परिषद्को मुख्य माग र चासो भएको परिषद्का अध्यक्ष पोमनारायण श्रेष्ठले बताए । सडक विस्तारको शैलीलाई परिवर्तन गरी सडकको एक किनारतर्फ काम गर्ने र अर्कोतर्फबाट सवारीसाधनको सहज आवतजावतको वातावरण सिर्जना गर्न सके सेवाग्राहीलाई सहज वातावरण सिर्जना हुने उनले बताए । विभिन्न सिफ्टमा काम गर्ने गरी राति र दिनमा उत्तिकै शीघ्र गतिमा काम अगाडि बढाउन जरुरी रहेको पनि उनले सुनाए । संभव भएका ठाउँमा वैकल्पिक मार्ग र डाइभर्सनहरुको व्यवस्था गरी यात्रालाई सहज र छिटो बनाउन सके झनै उत्तम हुने परिषद्को भनाई छ ।

पोखरा मुग्लिन सडक खण्डको ठेक्का सम्झौता अब ८ महिनामात्र बाँकी छ । पोखरा मुग्लिन सडक सुधार आयोजनाले २ खण्डमा काम गरिरहेको छ । २ वर्षमा पूर्वी खण्ड आँबुखैरेनीबाट जामुने सम्म ३१ प्रतिशत र जामुनेदेखि पोखरा सम्म पश्चिम खण्ड जम्मा ८ प्रतिशतमात्र प्रगति भएको छ । पूर्वी खण्डको ठेक्का ६ अर्ब २१ करोड ३१ लाख १३ हजारमा ठेक्का लागेको थियो । सरकारले मुग्लिन–पोखरा सडक विस्तारका लागि चालु आर्थिक वर्षमा ५ अर्ब ४२ करोड विनियोजन गरेको छ । पूर्वी खण्ड अन्तर्गत तनहुँको आँबुखैरेनी खण्डमा ७ किलोमिटर कालोपत्रको काम सुरु भइसकेको छ । पश्चिम खण्ड अन्तर्गत जामुनेबाट पोखरासम्म २०७८ जेठ २ गते सम्झौता भई सोही सालको भदौ १२ गतेदेखि काम सुरु भएको थियो । यो खण्डको ठेक्का ७ अर्ब ४० करोड ४६ लाखमा चिनियाँ कम्पनी यनहुइ काइयुयान हाइवे एन्ड ब्रिज कन्सट्रक्सनले पाएको छ । यो खण्डको म्याद २०८१ भदौसम्म छ । कार्यक्रमको संचालन परिषद्का महासचिव सञ्जयकान्त सिग्देलले गरेका थिए ।