काठमाडौं । क्रिकेटर सन्दिप लामिछानेविरुद्धको अभियोगमा अभियोजन पक्षले अभियोग पुष्टि हुने प्रमाण पेस गर्न नसकेको दाबी गरेको छ । सन्दिपसँग अदालतले मंगलबार बयान लिएपछि बुधबारदेखि थुनछेक बहस सुरु भएको छ । सन्दिपले यसअघि ‘इन्कारी बयान’ दिँदै आएका थिए । मंगलबार इजलासमा पनि ‘बलात्कार नगरेको’ बयान उनले दिएका थिए ।

सन्दिपको बयान सकिएपछि थुनछेक बहसको पहिलो दिन बुधबार उनको अभियोगमा ‘प्रत्यक्ष प्रमाण अभियोजनकर्ताले पेस गर्न नसकेको र पीडित भनिएकी व्यक्तिको वास्तविक उमेरमा फरक परेकाले के आधार मान्ने ?’ भन्ने विषयमा बहस सुरु भएको अधिवक्ता मुरारी सापकोटाले जानकारी दिए ।

उनका अनुसार पीडित भनिएकी व्यक्तिको वास्तविक उमेर नागरिकता वा जन्मदर्ता केलाई आधार मान्ने भन्ने’ पनि वकालत गरिएको छ । अधिवक्ता सापकोटाले ‘आफूहरूले पीडित भनिएकी किशोरीको उमेर जन्मदर्ता आधार मानेर वकालत गर्नुपर्ने’मा जोड दिएको पनि उल्लेख गरे ।

नागरिकता जागिर खान सहज बनाउनका लागि घटाएर बनाइने प्रचलन रहेकाले ‘जन्मदर्तालाई नै आधार मान्नुपर्ने’मा जोड दिइएको उनले बताए । सन्दिपका तर्फबाट बहसमा सहभागी वकिलले ‘पीडित नाबालिग नभएको प्रमाणस्वरूप जन्मदर्ता प्रमाणपत्रको प्रतिलिपि’ न्यायाधीशसमक्ष पेस गरेका छन् ।

अदालतमा पेस प्रमाणपत्रमा ‘पीडित’ भनिएकी किशोरीको जन्म १८ असार २०६१ उल्लेख छ । त्यसअनुसार पीडित १८ वर्ष ३ महिना पूरा भइसकेको देखिएको छ । सन्दिपले पनि आपूmले बालात्कार नगरेको बयान दिँदै आएका छन् ।

‘पीडित भनिएकी व्यक्तिको वास्तविक उमेर कुनलाई मान्ने ? जन्मदर्तालाई मान्ने वा नागरिकतामा भएको उमेरलाई मान्ने ? ’cause नागरिकतापछि बनेको कागज भयो,’ अधिवक्ता सापकोटाको भनाइ छ, ‘जन्मदर्ता मौकामा बनेको कागज भयो । नागरिकता बनाउँदा पछि जागिर खानलाई सजिलो हुन्छ भनेर घटाएर बनाउने आम प्रचलन छ । त्यसले गर्दा हाम्रो जोड जन्मदर्तालाई नै आधार मान्नुपर्छ भन्ने छ ।’