पोखरा । पत्रकार गजेन्द्र भण्डारीको सम्झनामा उनका परिवारद्वारा स्थापित “गजेन्द्र भण्डारी सिर्जनशील राष्ट्रिय पत्रकारिता पुरस्कार” पोखरामा क्रियाशील पत्रकारद्वय राम गुरुङ र रामप्रसाद तिमिल्सेनालाई प्रदान गरिने भएको छ ।

नेपाल पत्रकार महासंघ कास्कीद्वारा सञ्चालित उक्त पुरस्कारको राशि नगद २५ हजार एक रुपैयाँ रहेको छ ।

एक कार्यक्रमका बीच यहि साउन २० गते प्रदान गरिने पुरस्कार अन्तर्गत पत्रकार गुरुङलाई २०७७ र तिमिल्सेनालाई २०७८ को पुरस्कार प्रदान गरिने महासंघले जनाएको छ ।

पुरस्कृत हुन लागेका पत्रकार गुरुङ दुई दशकदेखि फोटो पत्रकारितामा क्रियाशिल छन् भने तिमिल्सेना दुई दशकदेखि छापा तथा विद्युतिय संचारमाध्यममा क्रियाशिल छन् ।

अग्रज पत्रकार कोमलनाथ बरालको संयोजकत्वमा गठित प्रतिभा छनौट समितिले गरेको सिफारिसलाई महासंघको सोमबार सम्पन्न बैठकले अनुमोदन गरेको हो ।
समितिमा कृष्णप्रसाद बाँँस्तोला र श्याम कुँवर सदस्य तथा महासंघका अध्यक्ष विमला भण्डारी र सचिव माधव बराल पदेन सदस्य रहेका थिए ।