पोखरा । प्रेस चौतारी नेपालको पोखरामा यही फागुन २७ देखि हुने नवौं राष्ट्रिय महाधिवेशन सफल पार्न यहाँका सम्पूर्ण पत्रकार सम्वद्ध संघसंगठनले सघाउने प्रतिवद्धता व्यक्त गरेका छन् । देशभरका पत्रकार आफ्नो ठाउँमा भेला हुँदा सक्दो साथसहयोग गर्न तत्पर रहेको भन्दै उनीहरुले विचार र वाद भन्दा पेशागत कर्म र एजेण्डा माथि हुने बताए ।
महाधिवेशनको सन्दर्भमा प्रचार प्रसार उपसमितिले कास्कीमा क्रियाशील पत्रकार सम्बद्ध संगठसंगठनका नेतृत्व र पत्रकार अगुवाबीच गरेको अन्र्तक्रिया कार्यक्रममा वक्ताहरुले यस्तो बताएका हुन् । उनीहरुको एक स्वर थियो – ‘देशभरका पत्रकारमाझ एकता र सहकार्यको उदाहरणीय सन्देश प्रवाह गर्न राम्रो अवसर मिलेको छ । प्रेस चौतारीको राष्ट्रिय महाधिवेशन प्रेस चौतारी आबद्ध पत्रकारको मात्र होइन, यहाँका सबै पत्रकारहरको आफ्नै कार्यक्रम हो । पोखरा आउने पत्रकारले हाम्रो एकता र सहकार्य महसुस गरेर फर्किउन् ।’
प्रेस चौतारी नेपालका अग्रज नेता एवं कास्की शाखाका संस्थापक अध्यक्ष पुण्य पौडेलले यो महाधिवेशनमा सबै पत्रकारको संलग्नता रहेमा सबैलाई गज्जबको उदाहरण मिल्ने बताए । उनले जुनै दलको विचार मानेपनि पत्रकारहरुको साझा मुद्धा एकै भएको बताए ।
नेपाल प्रेस यूनियनका अग्रज नेता गंगाधर पराजुलीले पत्रकारको एजेण्डा नै महाधिवेशनको प्राथमिकतामा पर्नुपर्ने बताए । उनले प्रेस चौतारीको राष्ट्रिय महाधिवेशन पोखरामा हुुँदा यसलाई भव्य र सभ्य ढंगले सम्पन्न गर्नुपर्ने दायित्व सबै पत्रकारको रहेको उल्लेख गरे । श्रमजीवी पत्रकार न्यूनतम पारिश्रमिक निर्धारण समितिका पूर्व अध्यक्षसमेत रहेका पराजुलीले मिडिया र पत्रकारलाई जोगाउँदै, बचाउँदै अब कसरी अघि बढ्ने भन्ने सवालमा महाधिवेशनले मार्गनिर्देश गर्न सकोस् भन्ने शुभकामना व्यक्त गरे ।
प्रेस सेन्टर नेपालका केन्द्रीय नेता माधव पनेरुले हिजो सँगै रहेर पत्रकारिताका मुद्धा र विषयलाई अघि बढाइरहँदा आज परिस्थितिले अलग अलग बाटो हिँड्न बाध्य पारेपनि पत्रकारका हक हित र अधिकारका आन्दोलनमा सधैं प्रेस चौतारीसँगै उभिने बताए । उनले महाधिवेशन नेतृत्व चयनमा सीमित नरही पत्रकारका एजेण्डा केन्द्रित होस् भनी शुभकामना व्यक्त गरे ।
प्रेस काउन्सिल नेपालकी सदस्य दुर्गा भण्डारीले पत्रकारहरुको मुलुककै नेतृत्वदायी संगठन प्रेस चौतारीले आफ्नो महाधिवेशनमा पत्रकारको पेशागत, सामाजिक तथा भौतिक सुरक्षाका सवालमा ठोस योजना र रणनीति सम्बन्धमा छलफल होस् भन्ने सुझाव दिइन् । अहिले दलिय पक्षधरतासँगै व्यक्ति विशेष पक्षधरतासमेत मौलाएको र मानहानी गर्ने हर्कत बढेको भन्दै पत्रकारहरुले आचारसंहिता पालना गर्ने गराउने सवालमा चौतारीका सदस्यहरु प्रतिबद्ध बनोस् भन्ने कामना गरिन् ।
प्रेस यूनियनका केन्द्रीय उपाध्यक्ष एवं अग्रज पत्रकार रमेश पौडेलले सबै एक भएर महाधिवेशन सफल पार्नुपर्ने बताए । उनले कुनै एक संगठनको कार्यक्रम भन्दैमा पन्छिन नमिल्ने बताए ।
नेपाल पत्रकार महासंघकी केन्द्रीय सदस्य सरिता तिम्सिना पंगेनीले महाधिवेशन प्रचार प्रसार समितिको यो कार्यक्रम निकै प्रशंसायोग्य रहेको बताउँदै छाता संस्था पत्रकार महासंघले सबै पत्रकार यसरी नै एकता, मेलमिलाप र सहकार्य गर्दै अघि बढेको हेर्न चाहेको बताइन्।
पत्रकार महासंघ गण्डकीका महासचिव गोविन्द सुवेदीले पत्रकारिताका सवालमा पोखरा महाधिवेशनले ठोस सन्देश दिन सकोस् भन्ने कामना गर्दै आमसञ्चार विधेयक, पत्रकारका पारिश्रमिकका सवालमा उचित दबाब सिर्जना गर्न महाधिवेशन सफल रहने विश्वास व्यक्त गरे ।
पत्रकार महासंघ गण्डकीका सचिव एवं प्रेस युनियनका नेता यदुनाथ बञ्जाराले जुनै पार्टीमा संलग्न रहेपनि, जुनै वादबाट निर्देशित रहेपनि पत्रकारिताका सवालमा पत्रकार भनेको पत्रकार नै हो भन्दै सबैको साझा महाधिवेशन महसुस गराउने गरी कार्यक्रम आयोजना गरेकोमा खुशी व्यक्त गरे ।
पत्रकार महासंघ, कास्कीकी अध्यक्ष विमला भण्डारीले महाधिवेशनमा सहभागी हुन आएका प्रतिनिधिहरुलाई कास्कीका सम्पूर्ण पत्रकारका तर्फबाट आतिथ्यता प्रदान गर्न तयार रहेको बताइन् । उपाध्यक्ष रामप्रसाद तिमिल्सिनाले नेतृत्वगत भन्दा पनि नीतिगत बहस होस् भन्दै महाधिवेशन सफलताको कामना गरे ।
फोनिज गण्डकीका निवर्तमान अध्यक्ष हुम गुरुङले पार्टी राजनीति भन्दा पनि पत्रकारिता माथि हुने भएकाले सबै जना पत्रकारिताका सवालमा एकजुट हुन आह्वान गरे । उनले पोखरामा पहिलो पटक महाधिवेशन हुँदै गर्दा कास्कीबाटै चौतारीको केन्द्रीय नेतृत्व लिने गरी नेताहरु अघि बढ्न पनि सुझाए ।
प्रेस सेन्टर नेपालका पोखरा महानगर कमिटि अध्यक्ष शिवराज बस्ताकोटीले सबै पत्रकारलाई आमन्त्रण गरी सँगै एकसाथ अघि बढ्न आह्वान गर्नु निकै सकारात्मक कुरा भएको भन्दै सबै यसरी नै हातेमालो गर्दै अघि बढ्नुपर्ने बताए ।
प्रचार प्रसार उपसमितिका संयोजक रञ्जन अधिकारीको अध्यक्षतामा भएको कार्यक्रममा सबै संगठनका नेतृत्वलाई स्वागत गर्दै प्रेस चौतारी कास्कीका अध्यक्ष अर्जुन गिरीले चौतारीले नाम जस्तै सबैलाई समेट्दै, सबैको सहयोग लिँदै, दिँदै अघि बढ्ने नीति स्वरुप हात अघि बढाएको बताए । प्रेस चौतारी कास्कीकी उपाध्यक्ष बालकुमारी पौडेल (तारा)ले संयोजन गरेको कार्यक्रमको सञ्चालन सहसचिव ईश्वर देवकोटाले गरेका थिए ।
२०५५ साल मंसिरमा स्थापना भएको प्रेस चौतारी नेपालको नवौं राष्ट्रिय महाधिवेशन समेत फागुन २७ र २८ गते पोखरामा हुँदैछ । विभिन्न उपसमितिको क्रियाशिलता कारण राष्ट्रिय महाधिवेशनको रौनक पोखरामा बढ्न थालेको छ । राष्ट्रिय महाधिवेशनको उद्घाटन फागुन २७ गते नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले गर्नेछन् । महाधिवेशनमा देशभरका झण्डै १ हजार २ सय पत्रकारको सहभागीता रहने आयोजकको भनाई छ ।
