न्यूयोर्क (अमेरिका),  नेपाली कांग्रेसका केन्द्रीय सदस्य एबम पूर्व मन्त्री रमेश रिजालले नेपालको संविधानमा व्यवस्था गरिएको गैरआवासीय नागरिकता कार्यान्वयन प्रक्रियाको अन्तिम चरणमा पुगेको बताएका छन। केहि दिन देखि अमेरिका भ्रमणमा रहेका रिजालले न्युयोर्कमा आयोजित एक कार्यक्रममा प्रवाशमा बस्ने नेपालीहरूलाई गैर आवासीय नागरिकता दिन ढिलाइ गर्न नहुनेमा जोड दिए।

नेपाली जनसम्पर्क समिति अमेरिकाको लङआइल्यान्ड शाखाद्वारा आयोजित स्वागत तथा विशेष अन्तरक्रिया कार्यक्रमका कांग्रेस नेता एबम संघिय सांसद रिजालले भने, “प्रवासमा बसेर नेपालमा लगानी गर्नुभएको छ, नेपालको संस्कृति जोगाउनुभएको छ, नेपाललाई संकटमा सहयोग गर्नुभएको छ। यस्ता नेपालीलाई नागरिकता दिन कन्जुस्याइँ गर्नुको कुनै कारण मैले देख्दिन।”  सांसद रिजालले एनआरएनएभित्र देखिएको आन्तरिक विवादकै कारण गैरआवासीय नागरिकताको विषय ओझेलमा परेको हुन सक्ने बताए।

कार्यक्रमका सभापति नेपाली जनसम्पर्क समिति लङआइल्यान्ड शाखाका सभापति एवं नेपाली कांग्रेसका महाधिवेशन प्रतिनिधि विश्वराज वास्तोलाले नागरिकता कार्यान्वयनमा भैरहेको ढिलाईका कारण नेपालको सरकारमा बस्ने सबैजसो दलहरुप्रति प्रवासमा रहेका नेपालीहरू असन्तुष्ट बन्दै गएको बताए। अध्यक्ष बाँस्तोलाले जनसम्पर्क समितिको निर्वाचन लामो समयसम्म नहुँदा कार्यकर्ताहरू निराश बनेको समेत उल्लेख गरे।

कार्यक्रममा नेपाली जनसम्पर्क समिति अमेरिका का सभापति आनन्द बिष्ट, महासचिव मुनेन्द्र नेम्वाङ, पूर्व महासमिति सदस्य वेदप्रसाद खरेल, टाउन अफ हेम्पस्टेडका कार्यकारी निर्देशक जाहिद साहेद, अमेरिकन नेपाली समुदाय समन्वय समितिका अध्यक्ष बाबुराम शर्मा, कास्की समाज अन्तर्राष्ट्रिय समन्वय परिषदका अध्यक्ष एबम नेपाली काँग्रेसका युवा नेता शिव बहादुर वानिया, जनसम्पर्क समिति मकाउका संस्थापक सभापति एवं पूर्व महासमिति सदस्य अम्बिरराज जोशीले नेपालका राजनीतिक दलहरुले नेपाल भित्र र बाहिर रहेका नेपालीहरुको चाहना र अपेक्षा पुरा गर्न नसक्दा लोकतान्त्रिक शासन ब्यबस्था प्रति नै चुनौती बढेको बताउंदै नेपाली काँग्रेसले स्पष्ट दृष्टिकोण सहित आम नागरिकको अपेक्षा पुरा गर्न र हाल देखिएको निराशा र असन्तुष्टि अन्त्य गर्न पहल गर्नुपर्नेमा जोड दिए ।

कार्यक्रममा धादिङ नेपाली समाजका अध्यक्ष एवं जनसम्पर्क समिति अमेरिकाका नेता टक रुवाली, एनआरएनए अमेरिकाका सहकोषाध्यक्ष दिवाकर पाण्डे, लङआइल्यान्ड नेपाली समाजका पूर्व अध्यक्ष टिकाराज ढकाल र बसन्त चापागाईं, न्यूयोर्क च्याप्टरका सदस्य विशाल रेग्मी, त्रिवेणी टाइम्सका अमेरिका ब्युरो इन्चार्ज बेगम पण्डित, समाजका सचिव मोहन क्षेत्री, नेपाली कांग्रेसका नेता शिव फागो, समाजसेवी राज चौलागाईं, नेपाल महिला संघका पूर्व केन्द्रीय महाधिवेशन प्रतिनिधि लक्ष्मी वास्तोला र राजकुमार गुरूङ लगायत नेताहरूले पनि आआफ्नो भनाई राखेका थिए । कार्यक्रमको सञ्चालन समाजसेवी महेश खड्काले गरेका थिए ।

 संघिय सांसद रिजाललाई अमेरिकामा सम्मान 

यसैबीच अमेरिकन नेपाली समुदाय समन्वय समितिको पहलमा टाउन अफ ओयस्टर बे, न्यूयोर्कले आयोजना गरेको स्वागत तथा सम्मान कार्यक्रममा पनि कांग्रेस नेता एबम संघिय सांसद रिजाल सहभागी बने। कार्यक्रममा टाउन अफ ओयस्टर बेका अधिकारीहरूले नेपाली समुदायको योगदानको प्रशंसा गर्दै भविष्यमा अझ सशक्त सहकार्यको प्रतिबद्धता व्यक्त गरेका थिए। उक्त कार्यक्रममा सांसद एबम पूर्व मन्त्री रिजाललाई सम्मान समेत गरिएको थियो।

एसिएन एडभाइजरी बोर्डका कार्यकारी निर्देशक ह्यारी मलहोत्रा लगायतले नेपाली समुदाय र टाउनबीचको सम्बन्धलाई अझ मजबुत बनाउन सकिने बताउंदै दुई मुलुकका समुदायबिचको सहकार्यलाई निरन्तर अघि बढाउने प्रतिबद्धता व्यक्त गरे।

उक्त कार्यक्रममा बोल्दै जनसम्पर्क समितिका नेता वेदप्रसाद खरेलले नेपाली समुदायको हितमा राजनीतिक रुपमा भन्दा सामाजिक रुपमा काम गर्न आबश्यक रहेको बताए । खरेलले भने, “हामीले नेपाल र प्रवासबीचको सहकार्यलाई सशक्त बनाउनका लागि यहाको स्थानिय सरकारसँग सहकार्य र समन्वय गर्नुपर्ने छ। यसका लागि नेपाली समुदायको एकता र प्रवासी नेपालीहरूको सक्रिय योगदानको आबश्यकता छ”।

कार्यक्रममा अमेरिका नेपाली समुदायका संस्स्थापक एवं वेस्टर वे टाउनमा साउथ एसिएन एडभाईजरी वोर्ड सदस्य विश्वराज वास्तोला, महासचिव शंकरराज भण्डारी, पण्डित डा. पिपलमणि सिग्देल, धादिङ नेपाली समाजका अध्यक्ष एवं जनसम्पर्क समिति अमेरिकाका नेता टक रुवाली, एनआरएनए अमेरिकाका महासचिव रामहरि अधिकारी, नेपाली कांग्रेस सिन्धुपाल्चोकका नेता मित्रबहादुर कार्की, समाजसेवी बेगम पण्डित, रमेश सत्याल, निरज सापकोटा, सुमन वास्तोला, कोपिला बराल वास्तोला लगायत विभिन्न संस्थासंग सम्बद्ध व्यक्तित्वहरूको उपस्थिति रहेको थियो।

तस्बिर : शिब बहादुर बाँनिया