पोखरा, पोखरा महानगरपालिका वडा नं. २६ बिजयपुर क्षेत्रमा जुवाको रुपमा कौडा खेलिरहेका ७ जनालाई पक्राउ गरेको प्रहरीले जनाएको छ। कास्की जिल्ला प्रहरी कार्यालय मातहतको ईलाका प्रहरी कार्यालय शिशुवाबाट खटिएको प्रहरी टोलीले कौडा खेल्ने र खेलाउने कार्यमा संलग्न ७ जनालाई नगद रू ५७ हजार सहित बिहिबार राति नियन्त्रणमा लिएको थियो ।
उनीहरुलाई जिल्ला प्रशासन कार्यालय कास्कीबाट सार्वजनिक हित, स्वास्थ्य, सुरक्षा, सुविधा र नैतिकता बिरुद्धको कसूर अन्तर्गत जुवा खेल्न वा सट्टेबाजी गर्न नहुने कसूरमा म्याद थप गरेर अनुसन्धान प्रकृया अगाडी बढाइएको कास्की प्रहरीले जनाएको छ।
यसैबीच चाडपर्वलाई लक्षित गरी जिल्ला प्रहरी कार्यालय कास्की र मातहतका प्रहरी कार्यालयबाट परिचालन गरिएको प्रहरी टोलीले जिल्ला पोखरा महानगरपालिकाको पृथ्वीचोक, सभागृहचोक, सृजनाचोक क्षेत्रमा सर्वसाधारण पर्यटकहरुलाई जबरजस्ती सवारी साधनमा चढाउन खोज्ने, होटल मिलाईदिन्छु भनी झोला तान्ने, करकाप गर्ने तथा दुखहैरानी दिने ५ जनालाई पक्राउ गरेको जनाएको छ।
पक्राउ पर्नेहरुमा चितवन भरतपुर महानगरपालिका वडा नं – २ घर भई हाल जिल्ला पोखरा महानगरपालिका वडा नं ९ बसपार्क बस्ने वर्ष- २३ को रोसन गुरुङ, नवलपुरको देवचुली नगरपालिका- १६ लक्ष्मिमार्ग बस्ने वर्ष ३१ सुरेन्द्र पाण्डे, कास्कीको पोखरा महानगरपालिका वडा न. २३ बस्ने वर्ष २९ को सन्दिप बस्नेत, कास्कीको रुपा गाउँपालिका वडा नं. ५ बस्ने वर्ष २४ को शंकर सुनार र गोरखाको भिमसेन गाउँपालिका वडा नं. ५ गैरिकुवा बस्ने वर्ष १९ को रमेश रिमाल रहेको प्रहरीले जनाएको छ ।
नियन्त्रणमा लिईएकाहरुलाई थप अनुसन्धान तथा आवश्यक कारवाहीको लागि वडा प्रहरी कार्यालय बैदाममा पठाइएको कास्की प्रहरीले जनाएको छ।
