पोखरा, विवेक बचत तथा ऋण सहकारी पोखरा–९, अर्चलबोटको आयोजनामा शनिबार यसका सेयर सदस्यको रगत जाँच निशुल्क रुपमा गरिएको छ । पोखराको न्युरोडमा रहेको गण्डकी प्रदेशकै पहिलो र एकमात्र आइएसओ प्रमाणपत्र प्राप्त रेफरेन्स ल्याब युनाइटेड रेफरेन्स ल्याबोरेटरी (युआरएल)को प्राविधिक सहयोगमा २ सय जनाको मधुमेह र रगतमा हुने खराब बोसो (टिजी) सम्बन्धी रगत जाँच गरिएको हो ।
कार्यक्रममा वरिष्ठ मधुमेह, थाइराइड तथा हर्माेन रोग विशेषज्ञ डा बिराज बरालले मधुमेह, थाइराइड र हर्मनका समस्यामा हेलचेक्र्याइ गर्न नहुनेमा जोड दिए । उनले भने, ‘मधुमेह, थाइराइड, टिजी लगायतले बहुआयामिक जोखिम ल्याउँछन् । यी समस्याबाट बाच्न बेला बेलामा परीक्षण र आवश्यक सजगता जरुरी छ ।’
कार्यक्रममा युआरएलका अध्यक्ष ठाकुरप्रसाद पन्तले ८ जिल्लामा रहेका युआरएलका २४ शाखामार्फत गुणस्तरीय सेवा प्रवाह गरिरहेको जानकारी दिए । उनले विभिन्न संघ, संस्थासँगको सहकार्यमा झण्डै अढाई सय निशुल्क शिविर गरी सामाजिक उत्तरदायित्व निर्वाह गरिरहेको उनले स्मरण गरे ।
सहकारीकी अध्यक्ष लक्ष्मी पौडेल पराजुलीको अध्यक्षतामा भएको कार्यक्रममा युआरएलका प्रबन्ध निर्देशक गणेशप्रसाद कोइराला, कार्यक्रम संयोजक मित्रलाल पौडेल, पुष्पराज कोइराला लगायतले आआफ्नो भनाई राखेका थिए ।
