पोखरा, कास्कीको माछापुच्छ्रे गाउँपालिका नवनिर्मित सुपर सेती हाइड्रोपावरको बाटो खन्ने क्रममा माथिबाट अचानक पहिरो खस्दा त्यहाँ कार्यरत दुई जना कामदारहरुको पुरिएर मृत्यु भएको छ भने एक जना घाइते भएका छन । मृत्यु हुनेमा धनकुटाको पाख्रिबास नगरपालिका – ८ घर भएका २६ बर्षीय आयुष राई र खोटाको केपिलास गाउँपालिका- १ घर भएका २७ बर्षीय किसान राई रहेको प्रहरीले जनाएको छ ।
आज शनिबार बिहान ११ बजे बाटो खन्ने क्रममा आएको पहिरोमा परी घाइते भएका उनीहरुलाई स्थानीय बासिन्दाले तत्कालै उद्धार गरी मणिपाल शिक्षण अस्पताल पठाएको भएपनि दुवै जनाको उपचारका क्रममा दिउँसो सवा १ बजे मृत्यु भएको थियो । सार्दिखोलास्थित प्रहरी चौकीबाट प्रहरी सहायक निरीक्षक रामचन्द्र श्रेष्ठको कमान्डमा त्यहाँ टोली पुगेको ।
सोही घटनामा इलाम घर भएका ३२ वर्षका भक्तबहादुर मगर पनि घाइते भएका छन् । उनको घुँडामा चोट लागेको र अवस्था सामान्य रहेको अस्पतालले जनाएको छ । मगरलाई पनि स्थानीयले नै उद्धार गरी उपचारका लागि पोखरा पठाएका थिए । यसअघि पनि उक्त क्षेत्रमा सडक खन्ने क्रममा सानातिना पहिरोहरु खस्ने गरेको स्थानीयले बताएका छन।
(फाइल तस्बिर)
