पोखरा, बालेन्द्र शाह नेतृत्वको सरकारले राष्ट्रपति रामचन्द्र पौडेलले जारी नगरिकन पुनर्विचार गर्न भनि फिर्ता पठाएको संवैधानिक परिषद्सम्बन्धी अध्यादेश फेरि पनि स्वीकृतिको लागि राष्ट्रपति रामचन्द्र पौडेललाई पठाएको छ। आइतबार मात्र राष्ट्रपति पौडेलले पुनर्विचारका लागि फिर्ता पठाएको अध्यादेश सोमबार पुन सोहि अबस्थामा नै राष्ट्रपतिकोमा पठाइएको छ ।

सोमबार बिहान बसेको मन्त्रिपरिषद् बैठकले उक्त अध्यादेश जारी गर्नका लागि राष्ट्रपतिसमक्ष पठाउने निर्णय गरेको सरकारका प्रवक्ता तथा शिक्षामन्त्री सस्मित पोखरेलले बताए। ‘राष्ट्रपति कार्यालयले संवैधानिक परिषद्सम्बन्धी अध्यादेश पुनर्विचारका लागि सरकारलाई फिर्ता पठाएको थियो। मन्त्रिपरिषद्ले यसमा कुनै परिवर्तन नगरी पुनः राष्ट्रपतिसमक्ष पठाउने निर्णय गरेको छ,’ पोखरेलले जानकारी दिए।

सरकारको यस निर्णयसँगै अध्यादेशको भविष्यबारे संवैधानिक र राजनीतिक वृत्तमा चासो बढेको छ। राष्ट्रपतिको अर्को कदम के हुन्छ भन्नेबारे प्रतीक्षा गरिएको छ। राष्ट्रपति पौडेलले यस अगाडी पनि पटक पटक फिर्ता पठाएको उक्त अध्यादेश अब फेरी स्वीकृत गर्छन वा फिर्ता पठाउलान भन्ने चासो बढेको छ। यसले राष्ट्रपति र सरकार बीच द्वन्द बढ्नसक्ने र सरकारले दुई तिहाईको दम्भको आधारमा राष्ट्रपति पौडेललाई महाभियोग लगाएर हटाउन खोज्ने अनुमान समेत गर्न थालिएको छ। राष्ट्रपति पौडेलले सरकारले पठाएका अन्य धेरै अध्यादेशहरु भने स्वीकृत गरिसकेका छन ।