पोखरा, पोखरा महानगरपालिका वडा नं. २९ सैनिक बस्ती क्षेत्रमा लागू औषधको कारोबार भईरहेको भन्ने सूचनाको आधारमा जिल्ला प्रहरी कार्यालय कास्की र मातहत इलाका प्रहरी कार्यालय शिशुवाबाट खटिएको प्रहरी टोलीले एक महिलालाई नगद चार लाख एक हजार रुपैया र केहि लागु औषध सहित पक्राउ गरेको छ।

पक्राउ पर्नेमा पर्वत जिल्लाको कुश्मा नगरपालिका -१२ घर भई पोखरा महानगरपालिका -२९ बस्ने २६ बर्षीय सिमा दर्जी रहेको कास्की प्रहरीका सुचना अधिकारी एबम प्रहरी नायब उपरिक्षक हरिबहादुर बस्नेतले गुरुकुल खबरलाई जानकारी दिए ।

पक्राउ परेकी दर्जीको साथबाट डाइजापाम -१ एम्पुल, फेनेरागन -१ एम्पुल र ब्रुफिनुर्फिन -६ एम्पुल गरी जम्मा ८ एम्पुल लागूऔषध, मोवाईल दुई थान र नगद चार लाख एक हजार रुपैया बरामद गरिएको प्रहरीले जनाएको छ।

पक्राउ परेकी दर्जीलाई कास्की जिल्ला अदालतबाट लागू औषध सम्बन्धी मुद्दामा छ दिनको म्याद थप गरी अनुसन्धान प्रकृया अगाडी बढाईएको प्रहरीले जनाएको छ। प्रहरीका अनुसार पक्राउ परेकी महिला यस भन्दा अगाडी पनि लागु औषध मुद्धामा पक्राउ परेको र अदालतको आदेश अनुरुप कास्की कारागारमा सजायं भोगिरहेकी थिईन।

तर, जेनजी पुस्ताको नाममा भएको आन्दोनलको क्रममा कारागारबाट बाहिर निस्केर फरार रहेकी उनि यस पटक फेरी लागु औषध सहित पक्राउ परेपछि अब कस्तो कारबाही होला भन्ने जिज्ञासा धेरैले राखेका छन ।