काठमाडौँ,  नेपाली कांग्रेसको आधिकारिकता सम्बन्धि बिबादलाई लिएर सर्वोच्च अदालतमा आइतबार हुने भनिएको सुनुवाई स्थगित भएको छ पार्टीको आन्तरिक बिबादपछि बिशेष महाधिबेशन गरेर नयाँ कार्यसमिति घोषणा गरेको गगन थापाको समुहलाई आधिकारिकता दिने निर्वाचन आयोगको निर्णयविरुद्ध १४ औं महाधिबेशनबाट निर्निबाचित सभापति शेरबहादुर देउवा समूहमा रहेका कार्यबाहक सभापति पूर्णबहादुर खड्काले सर्वोच्चमा दायर गरेको मुद्दाको सुनुवाइ स्थगित गरिएको हो।

सर्वोच्च अदालतले कांग्रेसको विवाद सम्बन्धि मुद्धाको आजका लागि पेसी तोकेकोमा सुनुवाइका लागि इजलास नतोकिएको हो । यसअघि सर्वोच्च अदालतले नेपाली कांग्रेसको आधिकारिकता विवाद सम्बन्धी मुद्दामा अन्तरिम आदेश दिन अस्वीकार गरेको थियो ।  २०८२ माघ ६ मा न्यायाधीश सुनिलकुमार पोखरेलको एकल इजलासले अन्तरिम आदेश जारी गर्न अस्वीकार गर्दै निर्वाचन आयोगसहितको नाममा लिखित जवाफ पेस गर्न आदेश जारी गरेको थियो ।

निर्वाचन आयोग, नेपाली कांग्रेस पार्टी कार्यालय र सभापति गगन थापाले लिखित जवाफ पेस गरेसँगै सुनुवाइका लागि पेसी तोकिएको थियो। गगन थापा र विश्वप्रकाश शर्मा समूहले विशेष महाधिवेशन आह्वान गरेर नयाँ कार्यसमिति चयन गरेपछि कांग्रेसमा आधिकारिकताको विवाद भएको थियो । १४ औं महाधिबेशनबाट निर्बाचित उपसभापति एबम तत्कालिन कार्यवाहक सभापति पूर्णबहादुर खड्काले अदालतमा रिट दर्ता गराएका थिए ।

रिट निवेदनमा कांग्रेस नेता देउवा र पूर्णबहादुर खड्काको वारेसमा श्रवणकुमार श्रेष्ठले दायर गरेको रिट निवेदनमा निर्वाचन आयोगको निर्णय बदर र नयाँ निर्वाचित कार्यसमिति अवैधानिक भएको भन्दै भङ्ग गर्न माग गरिएको छ । देउवा पक्षले नियमित महाधिवेशनको मिति तोकिसकेको अवस्थामा विशेष महाधिवेशनको औचित्य नहुने उल्लेख गर्दै विशेष महाधिवेशनलाई अस्वीकार गर्दै आएको छ ।