काठमाडौँ, काठमाडौँबाट खोटाङका लागि उडेको एयर डाइनेस्टीको हेलिकप्टर खोटाङको बालाबेंसीमा दुर्घटनामा परेको छ । हेलिकप्टरमा सवार ६ जना भने सकुशल रहेको छन । हेलिकप्टरमा १ जना पाइलट र ५ जना यात्रु गरी जम्मा ६ जना सवार थिए । दुर्घटनामा एक जनालाई सामान्य चोट लागेको छ भने अन्य सबैको अवस्था सामान्य रहेको प्राधिकरणले जनाएको छ।

भिरालो जस्तै देखिने जमिनमा अवतरण गर्न लागेको उक्त हेलिकप्टर असन्तुलित भएर पल्टिन गई दुर्घटना हुन पुगेको भिडिओमा देख्न सकिन्छ।   नेपाल नागरिक उड्डयन प्राधिकरणले पनि अवतरण गर्ने क्रममा असन्तुलित भएर दुर्घटना भएको जनाएको छ। क्यानका अनुसार दुर्घटनामा परेको ‘९ एन–एएफक्यू’ कलसाइन भएको उक्त हेलिकप्टरमा सवार सबैजना सुरक्षित रहेका छन् ।

खोटाङको केपिलासगढी गाउँपालिकामा भएको उक्त दुर्घटनामा परेका मध्ये सोही स्थानका ५० वर्षीय काजीबहादुर राई घाइते भएका छन्। घाइते राईलाई तत्कालै एयर डाइनेस्टीकै अर्को हेलिकोप्टरमार्फत थप उपचारका लागि काठमाडौं पठाइएको प्रहरीले जनाएको छ।

हेलिकोप्टरका चालक सविन थापाको अवस्था सामान्य रहेको र उनी काठमाडौं फर्किसकेको प्रहरीले जानकारी दिएको छ। यस्तै हेलिकोप्टरमा सवार अन्य यात्रुहरू लक्ष्मी राई, समला राई, बालकुमार राई र दासमणि राई सकुशल रहेका छन्। उनीहरूको अवस्था सामान्य रहेको प्रहरीले जनाएको छ।

त्रिभुवन अन्तर्राष्ट्रिय विमानस्थलबाट बिहान ११ः ०० बजे उडेको उक्त हेलिकप्टर दिउँसो ११ः ५१ बजे दुर्घटनामा परेको थियो । अवतरणका क्रममा असन्तुलित भएर  हेलिकप्टर पल्टिएको जनाउंदै हेलिकप्टरमा शव बोकिएको भन्ने हल्ला सत्य नरहेको पनि क्यानले स्पष्ट पारेको छ ।