बिरगंज, पर्सा जिल्लाको वीरगन्ज बजारमा हिन्दु र मुस्लिमबिचको द्वन्दको अवस्था नियन्त्रण बाहिर जान थालेपछि स्थानीय प्रशासनले कर्फ्यु आदेश जारी गरेको छ । यसअघि सोमबार दिउँसो १ बजेदेखि जारी गरिएको निषेधाज्ञाका बीच दुवै पक्षले ठाउँ–ठाउँमा प्रदर्शन गरिरहेपछि स्थिति नियन्त्रण बाहिर जान थालेको हो ।

टिकटकबाट सुरु भएको विवाद धनुषाबाट वीरगन्ज सरेपछि नजिकका अन्य जिल्लामा पनि सुरक्षा सतकर्ता बढाउंदै बिरगंज बजारमा कर्फ्यु लगाइएको हो ।  केही दिनअघि धनुषा जिल्लाको जनकपुर क्षेत्रमा हैदर अन्सारी र अमानत अन्सारी नामका दुई युवाले एउटा विवादस्पद भिडिओ टिकटकमा अपलोड गरेको र उक्त भिडिओले धार्मिक सहिष्णुता बिगारेको भन्दै स्थानीयले दुवै युवालाई नियन्त्रणमा लिएर प्रहरीलाई जिम्मा लगाएका थिए।

यस विषयमा इलाका प्रहरी कार्यालय, खजुरीमा छलफल भइरहँदा पक्राउको विरोध गर्ने र पक्राउको समर्थन गर्ने समूहबीच झडप भएको थियो। यो विवादको केन्द्र धनुषाको खजुरी र जनकपुर क्षेत्र हो। यो घटनाको विरोध र समर्थनमा सामाजिक सञ्जालमा भइरहेका बहसले वीरगन्जका युवा पनि आन्दोलित बनेका हुन्। आइतबार बिहानैदेखि वीरगन्जको घण्टाघर र आसपासका क्षेत्रमा युवाले टायर बालेर प्रदर्शन गरेका छन्।

‘स्थिति नियन्त्रणमा लिन वीरगन्जमा प्रहरीले लाठीचार्ज गर्नुपर्‍यो’, नेपाल प्रहरी, मधेश प्रदेश प्रमुख डीआईजी गोविन्द थपलियाका अनुसार सुरक्षा चुनौती बढेपछि प्रदेशभरि नै सुरक्षा सतर्कता बढाइएको छ।’  धनुषा र पर्सामा देखिएको अशान्तिको विषय टिकटकबाट फैलिएको हो। सामाजिक सञ्जालमा व्यक्त विषयले धार्मिक, साम्प्रदायिक भावनामा चोट पुर्‍याएपछि दुवै पक्ष सडकमा उत्रिएका हुन्।

शुरुमा धनुषाको कमला नगरपालिका–६ सखुवा मरानस्थित मस्जिदमा शनिबार राति भएको तोडफोडको विरोधमा वीरगन्जका मुस्लिम समुदायले आइतबार वीरगन्जमा प्रदर्शन गरेका थिए । मुस्लिम समुदायको प्रदर्शनको प्रतिक्रियामा हिन्दु समुदायले पनि आइतबार राति र सोमबार बिहानैदेखि प्रदर्शन गरेपछि वीरगन्जको स्थिति तनावग्रस्त हुन् पुगेको बिरगंजका अग्रज पत्रकार दिपेन्द्र चौहानले गुरुकुल खबरलाई जानकारी दिए  ।