मुस्ताङ । मुस्ताङ जिल्लाको मुक्तिनाथ मन्दिर लगायतका स्थानमा हवाईमार्ग बाट जाने पर्यटकहरुको सङ्ख्यामा कमि आएपछि मुस्तांगको जोमसोममा उडान गर्ने निजी वायुसेवा कम्पनीले पोखरा–जोमसोमको हवाई सेवा तीन महिनाका लागि बन्द गरेका छन।
नियमित उडान भर्दै आएका कम्पनीहरू समिट एयरलाइन्स र तारा एयरलाइन्सले प्रतिकूल मौसम, हिमपातको सम्भावना र पर्यटक अफसिजनका कारण हवाई सेवा स्थगित गरेको नागरिक उड्यन कार्यालय जोमसोमका प्रमुख दीपक पोखरेलले जानकारी दिए ।
जोमसोम विमानस्थलका प्रमुख पोखरेलका अनुसार नियमित हवाई सेवा स्थगित भएपनि चार्टर र आपत्कालीन हेली सेवा भने संचालनमा आउनेछन ।
तारा एयरलाइन्स मुस्ताङका स्टेशन इञ्चार्ज सुचन लालचनले कम्पनीले डिसेम्बर ४ देखि मार्च एक सम्म पोखरा–जोमसोमको नियमित उडान स्थगित गरेको बताए । त्यसैगरी समिट एयरलाईन्सले पनि नियमित उडान दुई महिनाका लागि स्थगित गरेको जनाएको छ ।
हिउँद याममा मुस्ताङमा हावाहुरी चल्ने भएकाले पनि पोखरा–जोमसोम उडान प्रभावित हुनेगर्छ । पछिल्लो समय बेनी–जोमसोम–कोरला सडक सहज भएपछि मुक्तिनाथ मन्दिर लगायत मुस्तांग जिल्लामा जाने हवाई यात्रुको सङ्ख्यामा बिगतमा भन्दा कमि आउन थालेको छ ।
