पोखरा, प्रतिनिधिसभा पुनर्स्थापनाको माग गर्दै सर्वोच्च अदालतमा बिभिन्न व्यक्ति र संस्थाको तर्फबाट दायर भएका सबै रिटमाथि अब एकैसाथ सुनुवाइ हुने भएको छ । सर्वोच्च अदालतको संवैधानिक इजलासले यसअघि कांग्रेसका आठजना निवर्तमान सांसदहरूले दायर गरेको रिटसँगै राखेर सुनुवाइ गर्न बुधबार आदेश जारी गरेको हो ।
प्रतिनिधिसभा पुनर्स्थापना माग गर्दै नेपाली कांग्रेस र अन्य दलका गरी निवर्तमान सांसदहरूले दायर गरेको रिटमा बुधबार सुनुवाइ भएको थियो। नेपाली कांग्रेसका प्रमुख सचेतक श्यामकुमार घिमिरे, सचेतक सुशीला थिङसहित आठ जना निवर्तमान सांसदले दिएको निवेदनका साथ सरिक हुन पाउँ भनी पूरक निवेदन दिएपछि संवैधानिक इजलासले एकैसाथ सुनुवाइ गर्न आदेश दिएको हो ।
अब संसद् पुनर्स्थापनाको माग राखि सर्वोच्चमा दर्ता भएका रिटमाथि एकसाथ सुनुवाइ हुने भएपनि कहिले टुंगिने भन्ने निश्चित छैन ।
यस अगाडी नेकपा एमालेका ७५ जना र नेपाली काँग्रेस सहित अन्य केहि दलका ६५ जना निबर्तमान सांसदले संसद पुनर्स्थापनाको माग गर्दै सर्वोच्च अदालतमा हस्ताक्षर बुझाएका छन । बिभिन्न व्यक्ति वा संस्थाको नामबाट पनि संसद बिघटनलाई असंबैधानिक भन्दै झन्डै डेढ दर्जनको संख्यामा अदालतमा रिट परेको छन ।
