काठमाडौँ, जेनजी पुस्ताको नाममा गत भदौ २३ र २४ गते भएको आन्दोलनपछि प्रतिनिधिसभा बिघटन गरिएकोमा त्यसलाई असंबैधानिक कदम भन्दै सर्वोच्च अदालतमा परेका झन्डै डेढ दर्जन मुद्धामा सर्वोच्च अदालतले अन्तरिम आदेश जारी गर्न अस्विकार गरेको छ।
सर्वोच्च अदालतले संसद् विघटन विरुद्ध परेका रिटमा बुधबार सुनुवाई गर्दै ७ दिनभित्र महान्यायाधिवक्ताको कार्यालय मार्फत लिखित जवाफ पेस गर्न आदेश दिएको छ ।राष्ट्रपति कार्यालय, प्रधानमन्त्री तथा मन्त्रिपरिषद्को कार्यालयलाई विपक्षी बनाई दायर रिटमा अदालतले महान्यायाधिवक्ता कार्यालय मार्फत ७ दिनभित्र लिखित जवाफ पेस गर्न आदेश दिएको हो ।
सर्वोच्च अदालतका प्रधानन्यायाधीश प्रकाशमानसिंह राउत र न्यायाधीशहरू सपना प्रधान मल्ल, कुमार रेग्मी, हरि फूयाल र डा. मनोजकुमार शर्माको संयुक्त इजलासले सरकारलाई नै कामकाज गर्न दिन नहुने मागसहित कानुन व्यवसायीहरूले अन्तरिम आदेश माग गरेको भएपनि अदालतले अन्तरिम आदेश दिन अस्वीकार गरेको हो ।
सर्वोच्च अदालतले आदेशमा भनेको छ, ‘अन्तरिम आदेश माग गरेको विषयवस्तु समेत रिट निवेदनको अन्तिम सुनुवाइ हुँदा विचार गर्नुपर्ने प्रकृतिको देखिँदा हाल निवेदन मागदाबी बमोजिम अन्तरिम आदेश जारी गरिरहनु परेन ।’
सर्वोच्च अदालतले सुशीला कार्कीको नेतृत्वमा सरकार गठन, उनकै सिफारिसमा प्रतिनिधिसभा विघटन लगायतका विषयमा आफ्नो जवाफ पेश गर्न सरोकारवाला निकायहरूलाई आदेश दिएको छ । राष्ट्रपति कार्यालय, प्रधानमन्त्री सुशीला कार्की, प्रधानमन्त्री तथा मन्त्रिपरिषद् कार्यालय, सभामुख लगायतलाई रिट निवेदनमा विपक्षी बनाइएको छ । सर्वोच्च अदालतले उनीहरूलाई पत्र पाएको एक साताभित्र जवाफ दिनु भनेको छ ।
सर्वोच्च अदालतको यो आदेशपछि अदालत प्रशासनले तामेलदारको सहयोगमा विपक्षी बनाइएका सबै निकाय र पदाधिकारीहरूलाई म्यादसहित आदेशको प्रति बुझाउनुपर्नेछ । उनीहरूले एक साताभित्र लिखित जवाफ पेश गर्नुपर्नेछ । त्यसपछि मात्र अदालतले मुद्दाको थप प्रक्रिया अघि बढाउने बाटो खुल्नेछ ।
कतिपय कानुन व्यवसायीहरूले नयाँ सरकार गठन र प्रतिनिधिसभा विघटनको फाइल पनि राष्ट्रपति कार्यालयबाट झिकाउन माग गरेका थिए । सर्वोच्चले अहिले ती कागजात झिकाएको छैन । फेरि ती कागजात झिकाउनु पर्दा मुद्दाको प्रक्रिया थप लम्बिनेछ । अधिवक्ता डा. प्रेमराज सिलवाल,कीर्तिनाथ शर्मा पौडेललगायतले सुशीला कार्की नेतृत्वको सरकार र प्रतिनिधिसभा विघटनविरूद्ध सर्वोच्च अदालतमा रिट दायर गरेका थिए ।
