पोखरा, पृथ्वीराजमार्ग अन्तर्गत तनहुँको आँबुखैरेनी गाउँपालिका–२ एक्लेफाँटमा मंगलवार भएको माइक्रोबस दुर्घटनामा १४ जना घाइते भएका छन्। चितवनबाट लमजुङतर्फ जाँदै गरेको बा प्र ०३–००१ ज ०९३७ नम्बरको विद्युतीय माइक्रोबस चालकले नियन्त्रण गुमाई सडकछेउको भित्तामा ठोक्किँदा त्यसमा सवार १४ जना घाइते भएको जिल्ला प्रहरी कार्यालय तनहुँले जनाएको छ। त्यसक्रममा उक्त माइक्रो सडक छेउमा रोकिराखेको नेपाल विद्युत् प्राधिकरणको बा१ञ १२८७ नम्बरको गाडीसँग समेत ठोक्किएको थियो।

घाइते हुनेहरुमा माइक्रोबसका चालक लमजुङको बेँसीसहर नगरपालिका–८ बस्ने ४२ वर्षीय ईश्वरकुमार श्रेष्ठ, चितवनको भरतपुर महानगरपालिका–१६ बस्ने ४५ वर्षीया शान्तामाया तामाङ, ४८ वर्षीया कमई तामाङ, ५५ वर्षीया बुधमाया तामाङ, ४२ वर्षीय गङ्गाबहादुर तामाङ, ४२ वर्षीया होमकुमारी तामाङ, १५ वर्षीया रश्मी तामाङ र ३७ वर्षीय डोलराज तामाङ छन्

यस्तै लमजुङको दोर्दी गाउँपालिका–४ बस्ने २० वर्षीया गङ्गा तामाङ, ६३ वर्षीया मैतीमाया तामाङ, नवलपुरको देवचुली नगरपालिका–१७ बस्ने ४७ वर्षीया इन्द्रकुमारी तामाङ, भरतपुर महानगरपालिका–१६ वर्षीया गममाया तामाङ, ३० वर्षीय मङ्गली तामाङ र पाँच वर्षीया सिर्जना तामाङ घाइते भएको प्रहरी नायब उपरीक्षक श्रवणकुमार विकले जानकारी दिएका छन। दुर्घटनाका घाइतेलाई उपचारको लागि आँबुखैरेनी अस्पताल पठाइएको प्रहरीले जनाएको छ।