काठमाडौँ,  राजावादी समूहले बिहीबार काठमाडौँमा गरेको प्रदर्शन करिब शान्तिपूर्ण रुपमा सम्पन्न भएको छ । राजतन्त्र फर्काउने उद्देश्यका साथ राजावादी समूहले बिहीबारदेखि अनिश्चितकालीन आन्दोलनको घोषणा गरेकोमा पहिलो दिनमा नै राजाबादीहरुको उपस्थिति उल्लेखनीय देखिएको थियो ।

जसअनुसार पहिलो दिनको प्रदर्शन राजधानीको शान्तिबाटिका क्षेत्रमा शान्तिपूर्ण ढंगले सम्पन्न भएको राप्रपाका प्रवक्ता सगुन लावतीले बताए । उनले आन्दोलन निरन्तर हुने जानकारी दिँदै आज पहिलो दिनको आन्दोलनमा संयुक्त जनआन्दोलन समितिका संयोजक  नवराज सुवेदीसहित विभिन्न राजावादी दल र संघसंस्थाका प्रतिनिधिको सहभागिता रहेको बताए ।

राजावादीहरू छाता र राष्ट्रिय झन्डासहित सडकमा आएका थिए । सो क्रममा उनीहरुले राजतन्त्रको पक्षमा अनि बर्तमान सरकार र प्रमुख दलका प्रमुख नेताहरु बिरुद्ध चर्का नाराबाजी गरेका थिए ।

यसैबीच राजसंस्था पुन: स्थापनका लागि भन्दै बनाइएको संयुक्त जनआन्दोलन समिति संयोजक नवराज सुवेदीले राष्ट्र, राष्ट्रियताको पक्षमा सबै नेपाली एक ठाउँ उभिनु जरुरी भएको बताएका छन् ।