पोखरा, राजाबादीहरुको अगुवाईमा काठमाडौँमा शुक्रबार भएको आन्दोलनका क्रममा आगजनी भएको घरभित्र जलेर निधन भएका पत्रकार सुरेश रजकको हत्या गरिएको भन्दै नेपाल पत्रकार महासंघले शनिबार बिहान काठमाडौँको माइतीघर मण्डलामा विरोध प्रदर्शन गरेको छ ।
महासंघले आफ्नो स्थापना दिवस मनाउन विभिन्न कार्यक्रम तय गरेको भएपनि बदलिएको परिस्थितिका कारण महासंघले स्थापना दिवसका पूर्वनिर्धारित सम्पूर्ण कार्यक्रम स्थगित गरी प्रदर्शनमा उत्रिएको जनाएको छ ।
स्थापना दिवसलाई पत्रकार ‘हत्या’ र सञ्चार गृह तथा संचारकर्मीमाथिको हमला विरुद्ध आन्दोलनका रूपमा शोक र विरोध सभाको रूपमा महासंघले मनाउने निर्णय गरेको महासंघका महासचिब रामप्रसाद दाहालले बिज्ञप्ति मार्फत जनाएका थिए।
महासंघले काठमाडौँमा जस्तै शोक र बिरोध कार्यक्रम गर्न आफ्ना शाखाहरुलाई परिपत्र गरे अनुसार पोखरा लगायत विभिन्न जिल्ला शाखाहरुले प्रदर्शन गरेको समाचार छ। यसैक्रममा नेपाल पत्रकार महासंघ कास्कीले शोक र बिरोध सभा गरेको जनाएको छ।
नेपाल पत्रकार महासंघ कास्कीले पोखराको शहिद चोकमा उक्त कार्यक्रम गरेको महासंघको कास्की शाखाका सचिब भुपाल गुरुङले गुरुकुल खबरलाई जानकारी दिए। उक्त कार्यक्रममा महासंघका कास्की शाखाका अध्यक्ष माधव बराल लगायतले पत्रकार र संचारकर्मी माथिको आक्रमण सह्य नहुने बताएका थिए।
