पोखरा, नेपाली काँग्रेस समर्थक भूतपूर्व सैनिकहरुको संगठन नेपाल भुतपूर्व सैनिक संघ गण्डकी प्रदेशको प्रथम अधिवेशन शनिबार पोखरामा सम्पन्न भएको छ। अधिबेशनले प्रयागराज भण्डारी अध्यक्ष रहेको ३५ सदस्यीय कार्यसमिति सर्बसम्मत चयन गरेको छ ।

गण्डकी प्रदेश समितिको महासचिवमा दानबहादुर भुजेल, कोषाध्यक्षमा रामप्रसाद तामाङ रहेका छन् भने सदस्यहरुमा टोपबहादुर खत्री, पदमबहादुर पौडेल क्षेत्री, मानबहादुर थापा, हर्क बहादुर भुजेल, क्षेत्र जंग भण्डारी, पदमबहादुर विक, आस्को गुरुङ, तोकबहादुर क्षेत्री, चोकबहादुर गुरुङ, डोलबहादुर थापा, दिलिप शर्मा पौडेल, परशुराम गुरुङ रहेका छन।

यसैगरी समितिका अन्य सदस्यहरुमा सुर्यबहादुर हमाल, निरबहादुर मल्ल ठकुरी, सालिग्राम खड्का, भिमबहादुर केसी, रविन्द्र गर्वुजा पुन, जिवन्धर चापागाई, नन्दबहादुर विक, गणेबहादुर गुरुङ, भगवति कुमाल, ध्रुब प्रताप मल्ल, जगत बहादुर बोहोरा, मोमबहादुर रोका मगर, सुब्बा पन्त, धर्मध्वज गुरुङ, चन्द्रमाया गुरुङ, बलबहादुर थापा, मिनबहादुर गुरुङ, खम्बा सिंह गुरुङ र गुनाखर न्यौपाने रहेको जानकारी नेपाली काँग्रेस गण्डकी प्रदेश कार्यालयका मुख्य सचिब पदम श्रेष्ठले गुरुकुल खबरलाई दिएका छन ।

नेपाली कांग्रेसका केन्द्रीय सदस्य एबम नेपाल भुतपूर्व सैनिक संघको महाधिबेशन निर्देशक समितिका संयोजक एनपी साउदले अधिबेशनको उद्घाटन गर्दै नेपालमा प्रजातन्त्र स्थापनादेखि हालसम्म भूपू सैनिकहरुले राष्ट्रलाई ठूलो योगदान दिएको बताए। उनले नेपालमा भएका हरेक आन्दोलनमा भूपू सैनिकहरु सक्रिय रहँदै आएको र जब राज्यमा संकटको अवस्था सृजना हुन्छ, त्यतिबेला भुुपु सैनिकहरु अग्रमोर्चामा रहेर काम गरेको उल्लेख गरे ।

भारतिय र व्रिटिस सेनामा स्थापनाकालिन भर्तिको बारेमा जानकारी गराउँदै नेपाली कांग्रेस र भुपु सैनिकको सम्बन्ध नङ र मासुको जस्तो रहेको र पार्टीको मेरुदण्डको रुपमा कायम रहेको स्पष्ट पारे।

अहिले नेपाली कांग्रेस गम्भीर अवस्थामा रहेको, भातृ संघहरुको समयमा निर्वाचन नहुँदा पार्टीलाई असर पारेको बताउंदै उनले पार्टीलाई कुनै योगदान नदिइकन आफूले पद मात्र खोज्ने प्रवृति बढेको भन्दै चिन्ता प्रकट गरे।  युवाहरुले पाएको जिम्मेवारी इमान्दारीताका साथ् पुरा गर्न  आग्रह गर्दै नेता साउदले सुरक्षा निकायजस्ता संस्थाहरूसँग सम्बन्धित ऐन–कानुन बनाउँदा सरकारले दुईतिहाइको दम्भ देखाउन नहुने बताए।

‘सुरक्षा निकाय जस्तो गम्भीर विषयसँग सम्बन्धित विधेयकहरू दुई तिहाइको सरकारले ल्याउँदा सयभन्दा बढी सांसदहरूले संशोधन हालि सकेका छन्, नेता साउदले भने ‘सुरक्षा निकाय जस्ता संस्थाहरूका बारेमा सरकार दुई तिहाइको दम्भमा बस्नु हुँदैन ।’ सुरक्षा निकायमा ‘चेन अफ कमान्ड’ कमजोर हुने गरी निजामती प्रशासनमा अधिकार राख्ने विषयले सुरक्षा निकायमा पर्न सक्ने दूरगामी असरका बारेमा गम्भीर छलफल हुनुपर्नेमा उनले जोड दिए ।

‘यस्तो बेलामा सरकार संवेदनशील हुनुपर्छ । यसले मुलुकको बाह्य सुरक्षा र आन्तरिक सुरक्षा पनि प्रभावित गर्न सक्ने भएको हुनाले चेन अफ कमान्ड कमजोर हुने गरेर निजामति प्रशासनमा अधिकार राख्ने कुराले सुरक्षा निकायहरूमा दूरगामी रुपमा के असर पर्ने हो भन्ने कुरामा गम्भीर छलफल, बहस हुन जरुरी छ,’ उनले भने ।

नेता साउदले संविधान संशोधन सहितका सात बुँदामा सहमति गरेर कांग्रेस–एमालेको सरकार गठन भएको सात महिना बितिसक्दा पनि संशोधनका लागि पहल नभएको भन्दै चिन्ता प्रकट गरे । ‘अहिलेको सरकार दुईतिहाइको सरकार छ । सात बुँदे सहमति गरेर सरकार गठन भएको हो । सात बुँदेको महत्वपूर्ण बुँदा के हो भने हामी संविधान संशोधन गर्ने भन्ने नै हो,’ उनले भने, ‘संविधान संशोधन गर्ने कुरामा सात–आठ महिना भइसक्यो, कसैले कलमसम्म चलाएको छैन ।’ साउदले संविधानमै १० वर्षमा पुनरावलोकन गर्ने भनेर उल्लेख गरिएको स्मरण गर्दै संविधान संशोधनको प्रक्रियामा अगाडि बढ्नुपर्नेमा जोड दिए ।

नेपाली कांग्रेस गण्डकी प्रदेशका सभापति शुक्रराज शर्माले भुपु सैनिकको नाममा लालपुर्जा रहेको जमिनमा सुकुम्वासी बस्ती बस्नुको कारण बारेमा चासो राखेका थिए । उनले सुकुम्वासीको समस्या समाधानमा राज्यले अर्को व्यवस्था गर्नुपर्ने र भुपु सैनिकहरुलाई न्याय दिनुपर्ने बताए ।

त्यसैगरी सभापति शर्माले कांग्रेसले प्रजातन्त्रमा विश्वास गर्छ, कांग्रेसले प्रजातन्त्र छोडे कसैको पनि भविष्य नरहने बताउँदै भुपु सैनिकको सुरक्षा नेपाली कांग्रेसले गर्ने भनाई राखे । प्रजातन्त्रमा जनता मालिक हुने र प्रतिनिधि र नेताहरु सेवक हुन्छन् भन्दै प्रजातन्त्रको ठाउँमा लोकतन्त्र राखेर नेपाली कांग्रेसले आफ्नो विरासत गुमाएको दाबी गरे ।

प्रजातन्त्रमा अधिकारको बाडफाड हुने बताउँदै सभापति शर्माले भने।, ‘संघियतामा अधिकार पाइएन भनेर अहिले जताततै गुनासो आएको छ । अघिकारको तत्लो भन्दा तल्लो तहमा पुर्याउने व्यवस्थाको नाम प्रजातन्त्र हो।’ भुपु सैनिकले जनमत संग्रहमा, पञ्चायत व्यवस्थाको विरोधमा, विभिन्न समयको निर्वाचनमा कांग्रेसलाई विजयी गराउनमा साथ दिएकोले फेरी एकपटक कांग्रेसको विरासत फर्काउन साथ दिनुपर्ने खाँचो रहेको शर्माको भनाई थियो।

चिनले सगरमाथा हाम्रो हो भनेर दाबी गर्दा वीपी कोइरालाले प्रमाण पेश गरेपछि चीन पछि हटेको स्मरण गर्दै विना प्रमाण चुच्चे नक्सा हाम्रो हो भनेर संसदमा पास गरेको र भारतले नेपालको हैन भन्दा हामीले प्रमाण पेश गर्न नसक्नु बिडम्बना भएको उनको तर्क थियो ।

उक्त कार्यक्रममा नेपाली कांग्रेसका केन्द्रीय सदस्यहरु शंकर भण्डारी, गोविन्द शाह, गुरु बराल, शारदा पौडेल लगायतले पार्टीलाई एकवद्धता गर्न सबै लाग्नुपर्ने भनाई रहेको थियो ।

नेपाल भुतपुर्व सैनिक संघका केन्द्रीय अध्यक्ष मेघराज टण्डन, गण्डकी प्रदेश सभा सदस्य पार्वती तामाङ, आदिवासी जनजाति महासंघ गण्डकी प्रदेशका अध्यक्ष जितबहादुर गुरुङ, भुपु सैनिक केशबहादुर गुरुङ, कृष्णबहादुर खत्री, नेपाली कांग्रेस कास्की २ का सभापति केशरप्रसाद निर्दोषी, पोखरा महानगरका सभापति सुरेन्द्रमान विजुक्छे लगायतले समारोहमा शुभकामना मन्तव्य व्यक्त गरेका थिए । संघका गण्डकी प्रदेश अध्यक्ष प्रयागराज भण्डारीको अध्यक्षतामा भएको उद्घाटन कार्यक्रमको संचालन दानबहादुर भुजेलले गरेका थिए ।