पोखरा, नेपाली काँग्रेसको भात्रीसंस्थाको रुपमा रहेको नेपाल प्रजातन्त्र सेनानी संघको महाधिबेशन २८ बर्ष पछि हुने भएको छ संघको प्रथम महाधिबेशन २०५३ सालमा भएकोमा दोश्रो महाधिबेशन २८ बर्षपछि अर्थात २०८१ को फागुन ७ गते हुनेभएको छ । यहि माघ ३ र ४ गते सम्पन्न नेपाल प्रजातन्त्र सेनानी संघको केन्द्रीय कार्यसमितिको बैठकले फागुन ७ देखि १० गतेसम्म काठमाडौँमा महाधिबेशन गर्ने निर्णय गरेको हो।

२०५३ देखि हालसम्म चार जनाले संघको अध्यक्ष बनेर काम गरेको भएपनि अधिबेशन भने हुन सकेको थिएन । संस्थापक अध्यक्ष कमल चित्रकारपछि तदर्थ समितिबाट चलेको संघको अध्यक्षमा हालसम्म चीजकुमार श्रेष्ठ, टंकमणि शर्मा कँडेल र हाल बालकृष्ण दाहाल तदर्थ समितिका अध्यक्ष बनेका छन ।

महाधिबेशन सम्पन्न गर्नको लागि मूल आयोजक समिति लगायत विभिन्न १५ उपसमितिहरू गठन गर्ने निर्णय गरेको छ । महाधिबेशन आयोजक मूल समितिको संयोजकमा नेपाल प्रजातन्त्र सेनानी संघको वर्तमान केन्द्रीय अध्यक्ष बालकृष्ण दाहाल रहेको र उनको संयोजकत्वमा संघको सम्पूर्ण केन्द्रीय सदस्यहरू तथा सात प्रदेशको प्रदेश अध्यक्षहरू सदस्य रहने गरी मूल समिति गठन गरिएको छ।

महाधिबेशन सम्पन्न गर्न गठित विभिन्न उपसमितिहरु मध्ये सचिवालय व्यवस्थापन उपसमितिको संयोजकमा उत्तरकुमार कटवाल, राजनीतिक प्रतिवेदन लेखन उपसमितिको संयोजकमा गोपाल गिरी, सांगठनिक प्रतिवेदन लेखन उपसमितिको संयोजकमा तेजप्रसाद सुवेदी, आर्थिक प्रतिवेदन लेखन उपसमितिको संयोजकमा अनार वस्नेत, आर्थिक व्यवस्थापन उपसमितिको संयोजकमा  वालकृष्ण दाहाल र  स्मारिका प्रकाशन उपसमितिको संयोजकमा पनि वालकृष्ण दाहाललाइ नै राखिएको छ ।

यसैगरी भोजन तथा खाजा व्यवस्थापन उपसमितिको संयोजकमा रुद्रबहादुर खड्का, अतिथि सत्कार उपसमितिको संयोजकमा रामदयाल यादव, मंच व्यवस्थापन उपसमितिको संयोजकमा सुरेन्द्रबहादुर चन्द, स्वयंसेवक परिचालन उपसमितिको संयोजकमा रामहरि शर्मा तिमिल्सीना, प्राथमिक उपचार उपसमितिको संयोजकमा डा. नमराज शर्मा पण्डित,  प्रचारप्रसार उपसमितिको संयोजकमा अमर रेग्मी, सांस्कृतिक उपसमितिको संयोजकमा यज्ञनिधि कोइराला, प्रजातन्त्र सेनानी सम्मान उपसमितिको संयोजकमा ध्रुवबहादुर मल्ल र निर्वाचन समितिको संयोजक डिएलए नेपाललाई बनाउने निर्णय बैठकले गरेको छ ।

यस अगाडी गत श्रावण १९ र २० गते नेपाल प्रजातन्त्र सेनानी संघको केन्द्रीय तदर्थ कार्यसमितिको बैठकले २०८१ सालको मंसीर मसान्त सम्ममा जिल्ला अधिवेशन र २०८१ साल पौष मसान्त भित्र प्रदेश अधिवेशन सम्पन्न गर्ने निर्णय गरेकोमा सोहि अनुरुप प्रदेश र जिल्ला अधिबेशन सम्पन्न भएपनि मुस्तांग जिल्ला र रुकुम पूर्व जिल्लामा बिशेष कारणबस अधिबेशन हुन नसकेको संघले जनाएको छ। नेपालका सतहत्तर जिल्लामा नेपाल प्रजातन्त्र सेनानी संघको सदस्य संख्या जम्मा तिन हजार दुईसय २८ रहेकोमा ७५ जिल्लावाट महाधिवेशनमा प्रतिनिधित्व गर्ने  महाधिवेशन प्रतिनिधिहरूको संख्या चारसय ५७ पुगेको छ ।

संघको पहिलो महाधिवेशन २०५३ सालमा भएकोमा त्यसपछी नेपाली काँग्रेसका केन्द्रीय सभापति शेरवहादुर देउवाले गत मंसीर १२ गते बालकृष्ण दाहाललाई संघको अध्यक्ष पदमा मनोनित गरेका थिए। दाहाल अध्यक्ष रहेको तदर्थ समितिमा नेपाल प्रजातन्त्र सेनानी संघको विधान अनुरूप ९५ सदस्यीय केन्द्रीय तदर्थ कार्य समितिले हाल काम गरिरहेको छ ।