काठमाडौँ, नेपाल आदिवासी जनजाति महासंघ (नेफिन)का अध्यक्ष गेल्जे लामा शेर्पाले प्रतिष्ठानले आदिवासी जनजातिको उत्थान र विकासका लागि धेरै काम गर्नुपर्ने भएकोले प्रतिष्ठानको बजेट वृद्धि गरेर ५० करोड बनाउन सरकारसँग माग गरेका छन् ।
आदिवासी जनजाति उत्थान राष्ट्रिय प्रतिष्ठानको २४औँ स्थापना दिवसका क्रममा मन्तव्य व्यक्त सम्बोधन गर्दै उनले बिहीबार त्यस्तो बताएका हुन् । अध्यक्ष शेर्पाले आदिवासी जनजाति आयोग र आदिवासी जनजाति उत्थान प्रतिष्ठानको विषयमा दुविधा आइरहेको बताए।
उनले भने, प्रतिष्ठान र आयोगको भूमिका फरक(फरक भएको हुनाले प्रतिष्ठानको औचित्यमाथि प्रश्न उठाउन पाइँदैन । प्रतिष्ठानलाई व्यवस्थित र स्रोतसाधन सम्पन्न बनाएर आदिवासी जनजातिको उत्थान र विकास हुनुपर्छ।
संविधान संशोधनको कुरा उठिरहेको सन्दर्भमा आदिवासी जनजातिको अधिकार कटौती गर्ने षड्यन्त्र हुनसक्ने भन्दै उनले यसमा सचेत हुनुपर्ने बताए । प्रतिष्ठानका उपाध्यक्ष रेशम गुरुङको अध्यक्षता तथा उपप्रधान एवं सहरी विकासमन्त्री प्रकाशमान सिंहको प्रमुख आतिथ्यमा कार्यक्रम भएको थियो।
प्रतिष्ठानका सदस्यसचिव कमलप्रसाद राजवंशीको स्वागत मन्तव्यबाट सुरु भएको कार्यक्रममा सांसद तथा नेकपा एमालेका सचिव तथा पूर्वमन्त्री पद्मा अर्याल, सांसद तथा पूर्वमन्त्री सांसद सीता गुरुङ, राष्ट्रिय सभा सदस्य सुरेश आलेमगर, आदिवासी जनजाति आयोगका अध्यक्ष रामबहादुर थापामगर लगायतले शुभकामना मन्तव्य व्यक्त गरेका थिए।
त्यस अवसरमा आदिवासी जनजाति उत्थान प्रतिष्ठान ऐन (मस्यौदा विज्ञ कार्यदल)मा रहेर काम गरेका संयोजक स्वर्गीय प्रा. डा. सन्तबहादुर गुरुङ, सदस्यहरू टेकनारायण राजवंशी, डा. कृष्ण भट्टचन, गंगादत्त चौधरीलगायतलाई सम्मान गरिएको थियो । यसैगरी कार्यक्रममा विभिन्न सांस्कृतिक नृत्यहरू समेत देखाइएको थियो ।
