सुबर्ण केसी / पोखरा 

नेपाली महिलाहरुको महत्वपुर्ण सांस्कृतिक पर्बको रुपमा रहेको हरितालिका तीजको अबसरमा पोखरा महानगरपालिका वडा न. ४ मा तीज गीत प्रतियोगिता हुने भएको छ। आगामी भदौ १५ गते शनिबार हुने उक्त प्रतियोगितामा वडा न. ४ अन्तर्गत रहेका आमा समूहहरु, टोल बिकास संस्थाहरु र मिसा पुचसंग सम्बन्धित विभिन्न टोलीको सहभागिता रहने वडा न. ४ का वडाध्यक्ष देबकृष्ण पराजुलीले गुरुकुल खबरलाई जानकारी दिए।

वडाध्यक्ष पराजुलीका अनुसार मौलिक कला, संस्कृति र परम्परा जगेर्ना गर्ने र महिलाहरुको शसक्तिकरणमा टेवा पुर्याउने उद्धेश्यले कार्यक्रम गरिएको हो । वडा कार्यालयले यस अगाडी पनि यस किसिमको तीज गीत प्रतियोगिताको आयोजना गरेको थियो । वडा कार्यालयले स्थानीय बिकास निर्माणका कामहरुको साथै संस्कृति र परम्पराको जगेर्ना गर्न योमरी महोत्सब, तायमचा नृत्य आदिमा सहयोग गर्दै आएको छ।

स्थानीय गणेश गुठिको परिसरमा हुने प्रतियोगितामा बिजयी हुनेहरुलाई पुरस्कारको ब्यबस्था समेत गरिएको छ। जस अनुसार प्रथम हुने समुहलाई २० हजार, दोश्रो हुने समुहलाई १५ हजार, तेश्रो हुने समुहलाई १० हजार र शान्त्वना हुने समुहलाई ५ हजार रुपैया नगद पुरस्कारको ब्यबस्था गरिएको छ।

यसैगरी उत्कृष्ट भेषभुषाको लागि ३ हजार, उत्कृष्ट नृत्यको लागि ३ हजार र उत्कृष्ट समय ब्यबस्थापकको लागि पनि ३ हजार रुपैया पुरासार ब्यबस्था गरिएको उक्त प्रतियोगितामा सहभागी बन्ने सबै समुहलाई २ हजारको दरले सहयोग गरिने भएको वडा सदस्य पार्वती माकाजुले जानकारी दिईन।

तीज गीत प्रतियोगितासंगै स्थानीय र लोकप्रिय कलाकारहरुले विभिन्न गीत संगीत समेत प्रस्तुत गर्ने कार्यक्रम छ जस अनुसार सुनिता, दुर्गा र कृष्ण सुबेदी लगायतका कलाकारले तीज गीत सहित विभिन्न लोक गीत प्रस्तुत गर्ने छन।