पोखरा, नेपाल खेलकुद महासंघको १५ औं स्थापना दिवसको अवसरमा महासंघ गण्डकी प्रदेश कमिटि र नेपाल खेलकुद पत्रकार मञ्च (एनएसजेएफ) गण्डकीसंग मैत्रिपूर्ण फुटसल प्रतियोगिता सम्पन्न भएको छ ।
पोखरा–१४, हबेली मार्ग स्थित न्यू एयरपोर्ट फुटसलमा विहिबार भएको मैत्रिपूर्ण फुटसल प्रतियोगितामा महासंघ गण्डकीले मञ्च गण्डकीलाई १०—६ को गोल अन्तरले पराजित गरी विजयी भएको हो ।
मञ्चका उपाध्यक्ष एवं खेल संयोजक सुरज श्रेष्ठको कप्तानीमा मैदानमा उत्र्रिएको मञ्चले सुरुवाती चरणमै २ गोलको सामना गरेको थियो भने महासंघको तर्फबाट महासचिव बिष्णु पुन सहितका खेलाडीहरुले उत्कृष्ट प्रर्दशन गरेका थिए ।
महासंघका केन्द्रिय महासचिव युवा नेता बिष्णु पुनले उक्त प्रतियोगिताको उद्घाटन गर्दै महासंघले यस बर्ष भरी नै पालिकाहरुमा विभिन्न खेलकुद प्रतियोगिता आयोजना गर्ने बताए । उनले खेलाडीहरुको प्रोत्साहनको लागि फुटवल सहितका केही राष्ट्रिय स्तरका प्रतियोगिताहरु समेत गर्ने तयारी गरेको जनाए । मञ्च गण्डकीका अध्यक्ष दीननाथ बरालले खेल गतिविधि हुनुले खेलाडी र खेलकुदको विकास हुने हुँदा यस्ता प्रतियोगिताँनिरन्तर रुपमा आयोजना गर्नुपर्नेमा जोड दिए ।
पोखरालाई खेल पर्यटनको रुपमा विकास गर्न पोखरामा राष्ट्रिय अन्तर्राष्ट्रिय प्रतियोगिताहरु निरन्तर रुपमा हुनै पर्ने उनको भनाई थियो । “खेलकुदको विकासका लागि स्थानीय तहदेखि केन्द्रसम्म भौतिक पूर्वाधार, व्यवसायिक र प्रतिस्पर्धी खेलकुद गतिविधि हाम्रो आधार” भन्ने मुल नाराका साथ महासंघले विभिन्न कार्यक्रमको आयोजना गरी स्थापना दिवस मनाउने भएको महासंघ गण्डकीका कार्यबहाक अध्यक्ष दीपेन्द्र शर्माले बताए । महासंघको स्थापना दिवसको उक्त अवसरमा केक समेत काटिएको रमेश कार्कीले बताए ।
