मेरिल्याण्ड, नेपाली सांगीतिक क्षेत्रमा पछिल्लो समय उदाएर पनि दर्शकमाझ लोकप्रिय मानिने कलाकार प्रकाश सपुत केही समयदेखि अमेरिकाको विभिन्न राज्यमा सांगितिक कार्यक्रमको लागि व्यस्त छन् ।
गत अक्टोबरमा अमेरिका आएका गायक प्रकाशले अमेरिकाको टेक्सास र पेन्सलभानिया लगायतका स्थानमा आयोजित कार्यक्रममा आफ्नो प्रस्तुती दिईसकेका छन् । यसै क्रममा गायक प्रकाशले शनिवार र आईतबार अर्थात् नोभेम्बर ११ र १२ गते मेरिल्याण्ड राज्यको हेरिसबर्गमा र पेरिहलमा आफ्नो गायन सहितको प्रस्तुती दिंदै छन् ।
मेरिल्याण्डको पेरिहल स्थित फेम्ली किचनमा आईतबार हुने कार्यक्रमलाई “प्रकाश सपुतसँग तिहार नाईट” नाम दिईएको छ । गलबन्दी, बोल माया, सकम्बरी, कुरा बुझ्नुपर्छ जस्ता विभिन्न बोलका गीत सृजना गरेर साथै त्यस्ता गीत गाएपछि उनी निरन्तर चर्चामा छन् । गीत संगितबाट अगाड़ी बढेका प्रकाश पछिल्लो समयमा भने नेपाली चलचित्र परदेशी –२ को नायकको भुमिकामा ठूलो पर्दामा देखिन पुगे । अग्रज कलाकार नारायण रायमाझीले निर्देशन गरेको उक्त चलचित्रमा कलाकार प्रकाशसँगै नेपाली चलचित्र क्षेत्रका स्थापित कलाकारहरु समेत विभिन्न भुमिकामा रहेका छन् ।
उनै लोकप्रिय कलाकार प्रकाशसँग यही नोभेम्बर १२ गते आईतबार मेरिल्याण्डको पेरिहल स्थित फेम्ली किचनको हलमा “प्रकाश सपुत नाईट” कार्यक्रम राखिएको र सबै तयारी पूरा भएको फेम्ली किचनका संचालक निर बहादुर थापाले गुरुकुल खबरलाई जानकारी दिए । करिब तीन महिना अगाडीबाट संचालनमा आएको फेम्ली किचन विभिन्न सभा, समारोह, सांगितिक एवं अन्य कार्यक्रम गर्न उपयुक्त स्थल बनेको छ ।
“प्रकाश सपुत नाईट”कार्यक्रममा पेरिहल आसपास र मेरिल्याण्डको विभिन्न स्थानबाट करिव ३ सय जना गीत संगितका पारखी दर्शकहरु सहभागी बन्ने अपेक्षा गरिएको छ । कार्यक्रममा आउने दर्शकका लागि ३५ डलर प्रवेश शुल्क राखिएपनि सोही रकमबाट दर्शकहरुलाई डिनरको समेत व्यवस्था गरिएको संचालक थापाले जानकारी दिए ।
