पोखरा, गण्डकी प्रदेश सभामा नेपाली काँग्रेसबाट प्रतिनिधित्व गर्ने प्रदेश सभा सदस्यहरूले १५ दिनको तलब भूकम्प पीडितलाई सहयोग गर्ने भएका छन् ।

जाजरकोटको बारेकोट गाउँपालिका वडा नं. १, रामीडाँडा केन्द्रबिन्दु भएर गएको विनासकारी भूकम्पका पीडितहरुलाई यो सहयोग पठाउन लागिएको हो । भूकम्पका कारण जनधनको क्षतिप्रति दुःख व्यक्त गर्दै नेपाली काँग्रेस गण्डकी प्रदेश संसदीय दलले प्रदेश सभा सदस्यहरूको १५ दिन बराबरको तलब रकम नेपाली काँग्रेस, केन्द्रीय राहत कोषमार्फत भूकम्प पीडित राहत कोषमा जम्मा हुने गरी पठाउने निर्णय गरेको प्रमुख सचेतक नन्दप्रसाद न्यौपानेले जानकारी दिए ।

भूकम्पमा परी निधन भएकाप्रति श्रद्धाञ्जली व्यक्त गर्दै दलले घाइतेहरूको शीघ्र स्वास्थ्य लाभको कामना गर्दै भूकम्प प्रभावितलाई उचित राहत र व्यवस्थापनको लागि सरकारसँग अनुरोध समेत गरेको छ ।