पोखरा, पोखराका नेवार समुदायले २३ वर्षपछि पोखरामा बाघजात्रा प्रदर्शन गरेका छन् । सोमबार सुरु भएको जात्रा २० गते अन्त्य हुने जनाइएको छ ।
बाघजात्रा आयोजना गर्न पोखरा महानगरपालिका, वडा कार्यालय, नेवा छें लगायतले साथ दिएको र जात्रा १ लाख बढीले अवलोकन गर्ने अनुमान गरिएको छ । जात्रालाई महानगर र नेवाः खल कास्कीले संरक्षकत्व प्रदान गरेका हुन् । बाघजात्रा आयोजक समिति २०८० संयोजक जवाहरलाल श्रेष्ठले पोखरा महानगरपालिकासहित आसपास अरु पालिकाका प्रमुख, प्रदेश सरकार, सभासदसहित बाहिरी जिल्लाबाट पनि अतिथि, दर्शक र मेलामा सहभागिता जनाएको जानकारी दिए ।
यसपालिको जात्रामा राजाको रुपमा कलाकार जीतेशमान गुमाजू र रानीको रुपमा कलाकार शिवानी श्रेष्ठ गुभाजू छन् भने बाघको भूमिका सुरेश खड्गीले निर्वाह गरेका छन् । ऐनकुमार साई प्रधान सेनापतिको भूमिकामा छन् । हरेक दिनको जात्रा नेवा छेंबाट सुरु हुनेछ । सोमबार गणेशटोल, मोहरिया टोल बगर हुँदै फेरि नेवा छेंमा आएर जात्रा सम्पन्न भएको थियो । दोस्रो दिन पृथ्वीचोक नयाँबजार क्षेत्रमा यो जात्रा प्रदर्शन गरियो । बुधबार पोखरा रंगशालामा जात्रा देखाउने तयारी गरिएको छ ।
भनाई अनुसार गाउँ गाउँमा बाघले धेरै दुःख दिएपछि राजालाई यसबारे जानकारी दिइएको र राजाले सेनासहित आएर बाघ मारेको खुसीयालीमा जात्राको चलन चलेको हो । अहिले यो नेपाली खासगरी नेवारी समुदायको मौलिक र महत्वपूर्ण जात्राको रुपमा स्थापित भएको संयोजक जवाहरलालले बताए ।
Pictures: Photo Zenith
